काठमाडौं । फागुनमा विकास बैंकहरूको शेयर कारोबार करीब ५६८ प्रतिशत वृद्धि भएको छ । 

नेपाल स्टक एक्सचेञ्ज (नेप्से)ले सार्वजनिक गरेको फागुन महीनाको मासिक तथ्या‌ंक अनुसार गत वर्षको फागुनको तुलनामा यो वर्षको फागुनमा विकास बैंकहरूको शेयर कारोबार ५६७.९६ प्रतिशत वृद्धि भएको हो । 

गत वर्षको फागुनमा विकास बैंकहरूले रू. २ अर्ब ३० करोड बराबरको शेयर कारोबार गरेकोमा यस वर्षको फागुनमा रू. १५ अर्ब ३९ करोड बराबरको कारोबार भएको छ । 

समीक्षा अवधिमा विकास बैंकहरूको कारोबार कित्तासमेत बढेको छ । तथ्यांकअनुसार गत वर्षको फागुनमा विकास बैंकहरूले ६६ लाख १ हजार कित्ता कारोबार गरेकोमा यस वर्षको फागुनमा २ करोड २ लाख कित्ता शेयर कारोबार भएको हो । 

केही वर्षअगाडि एक विकास बैंकको शेयर मूल्य प्रतिकित्ता रू. १५० सम्म झरेकोमा अहिले त्यस कम्पनीको शेयर मूल्य १ हजार ९ सयभन्दा माथि पुगेको छ । यसले विकास बैंकहरूको शेयर मूल्यमा लगानीकर्ताको आकर्षण बढेको देखाउँछ । विकास बैंक समूहका कम्पनीहरूमध्ये अधिकांशको शेयर संख्या कम छ । 

शेयर कम भएपछि बजारमा शेयर आपूर्ति कम हुने भएकाले निश्चित समूह लागेर यस्ता कम्पनीको शेयर मूल्यमा अस्वभाविक उतावचढाव गराउने गरेको जानकार बताउँछन् । जसका कारण कारोबार रकम बढेको उनीहरूको भनाइ छ । 

यही अस्वाभिक शेयर मूल्य उताबचढावमा चलखेल भएकाले नेप्सेले चैत ७ गते देखि पछिल्लो १५ मिनेटमा (२ः४५ देखि ३ बजे) भएको कारोबार मूल्य र कित्तालाई आधार मानेर भारित औसत मूल्य गणना नियम लागू गरेको छ । 

फागुनमा शेयर कारोबार सर्वाधिक वृद्धि हुने समूहगत सूचकको सूचीमा दोस्रोमा अन्य समूह छ । समीक्षा अवधिमा यो समूहको शेयर कारोबार रकम ४८२ प्रतिशत वृद्धि भएको छ । 

तथ्यांक अनुसार संस्थापक शेयर र डिबेञ्चर गरेर १५ समूहमध्ये एक समूहको मात्रै शेयर कारोबार घटेको छ भने बाँकी सबैको बढेको छ । यीमध्ये उत्पादन तथा प्रशोधन समूहको शेयर कारोबार गत वर्षको फागुनको तुलनामा यस वर्षको फागुनमा ४ दशमलव १४ प्रतिशत घटेको छ । गत वर्षको फागुनमा यस समूहको रू. ७ अर्ब २३ करोड बराबरको शेयर कारोबार भएकोमा यस वर्षको फागुनमा रू. ६ अर्ब ९३ करोडमा झरेको हो । 

त्यस्तै पछिल्लो समय संस्थापक शेयर कारोबार पनि बढि देखिएको छ । गत फागुनमा संस्थापक शेयरको रू. १ अर्ब २५ करोड बराबरको कारोबार भएकोमा गत वर्ष फागुनमा रू. ३ अर्ब ५२ करोड बराबरको कारोबार भएको छ ।

समूह	२०८१ फागुन		२०८० फागुन		कारोबार रकमको घटबढ प्रतिशत
	कारोबार कित्ता हजारमा	कारोबार रकम रू दश लाख	कारोबार कित्ता हजारमा	कारोबार रकम रू दश लाख
विकास बैंक	20241.17	15392.81	6601.07	2304.46	567.96
अन्य	26061.01	27921.82	7504.54	4793.61	482.48
लगानी	22880.43	17129.28	6298.44	3162.56	441.63
लघुवित्त	10812.19	13470.69	3810.99	3068.28	339.03
म्युचुअल	38513.3	367.72	11729.73	97.75	276.18
जीवन बीमा	20446.5	14613.2	8067.95	4171.31	250.33
संस्थापक शेयर	22006.15	3528.49	5954.36	1257.7	180.55
हाइड्रोपावर	145426.52	59696.98	74434.05	23394.44	155.18
कमर्सियल बैंक	38733.71	10598.33	16935.73	4170.11	154.15
निर्जीवन	7604.6	6254.02	3821.83	2546.56	145.59
वित्त	15291.69	9612.14	9475.82	4030.48	138.49
होटल तथा पर्यटन	2593.55	2067.26	1817.13	1084.82	90.56
डिबेञ्चर	100.1	109.09	59.31	57.53	89.62
ब्यापार	72.38	396.62	63.51	305.51	29.82
उत्पादन तथा प्रशोधन	9911.65	6937.16	12259.74	7237.01	-4.14

स्रोत : नेप्से ।