काठमाडौं । पाँचथर पावर कम्पनी लिमिटेडले शतप्रतिशत हकप्रद शेयर निष्कासन गर्ने भएको छ ।

पुस २ गते बसेको कम्पनीको सञ्चालक समितिको बैठकले हाल कायम चुक्तापूँजी ९६ करोड २५ लाख रुपैयाँको आधारमा शतप्रतिशत हकप्रद शेयर निष्कासन गर्ने निर्णय गरेको हो । प्रतिशेयर १०० रुपैयाँ अंकित मूल्यमा ९६ लाख २५ हजार कित्ता हकप्रद शेयर निष्कासन गर्ने तयारी कम्पनीले गरेको छ ।

कम्पनीले आयोजना निर्माण तथा मर्मतका लागि लिइएको कर्जा भुक्तानी प्रयोजनका लागि हकप्रद शेयर निष्कासन गर्न लागेको जानकारी दिएको छ । यस कम्पनीले पाँचथर जिल्लामा १४ दशमलव ९ मेगावाट क्षमताको हेवा खोला ए जलविद्युत आयोजना निर्माण सम्पन्न गरिसकेको छ ।

गत असार २ गते आएको अविरल वर्षाका कारण हेवा खोलामा आएको बाढीले आयोजनालाई क्षति पुर्‍याएको र सोको मर्मतका लागि थप कर्जा लिनुपरेको भनाइ कम्पनीको छ । आयोजना पुनः सञ्चालनमा ल्याउन हाल आयोजनाको पुनः निर्माण कार्य भैरहेको छ । प्रस्तावित हकप्रद शेयर कम्पनीको आगामी वार्षिक साधारण सभाबाट पारित भएपछि मात्र निष्कासन प्रक्रियामा जानेछ ।