काठमाडौं । यूनाइटेड अजोड इन्स्योरेन्स लिमिटेडका दुई संस्थापकहरूको शेयर फरक फरक मूल्यमा विक्री खुला गरिएको छ । 

कम्पनीले शुक्रवार (आज) जारी गरेको सूचनाअनुसार आईजे ग्रुप प्रालिको नाममा रहेको ३ लाख ७४ हजार ४५ कित्ता र राधेश्याम अग्रवालको नाममा रहेको ३३ हजार १३७ कित्ता शेयर निष्कासनमा ल्याएको हो । आईजे ग्रुपले प्रतिकित्ता २२५ रुपैयाँ र राधेश्याम अग्रवालले प्रतिकित्ता २७५ रुपैयाँमा यी शेयर विक्री गर्न लागेका हुन् ।

यी शेयरमा विद्यमान संस्थापक शेयरधनीहरूले मात्र आवेदन पेश गर्न सक्नेछन् । आवेदन दिँदा खरीद गर्न चाहेको शेयर संख्या र मूल्यसमेत खुलाउनुपर्नेछ । आवेदन आगामी ३५ दिनभित्र कम्पनीको केन्द्रीय कार्यालय सुन्धारा, काठमाडौंमा पेश गर्न सकिनेछ । 

तोकिएको अवधिभित्र मागबमोजिम आवेदन प्राप्त नभएमा भने अन्य व्यक्ति तथा संस्थामा यी शेयर विक्री प्रक्रिया अघि बढाइने जानकारी कम्पनीले दिएको छ ।