काठमाडौं। नेपालका लागि बीवाईडी अटोको आधिकारिक वितरक साइमेक्स इंकले न्यू इनर्जी भेइकल (एनईभी)को ग्लोबल लिडर बीवाईडीसँगको सहकार्यमा ‘साइमेक्स बीवाईडी च्यारिटी फाउन्डेसन’को स्थापना गरेको छ । फाउन्डेसनले साइमेक्सद्वारा समाजलाई योगदान दिने प्रतिबद्धता व्यक्त गरेको छ । यसले अर्थपूर्ण र समुदाय केन्द्रित पहलको नयाँ अध्यायको थालनी हुने बताइएको छ ।

फाउन्डेसनमा साइमेक्स इंकले १ करोड रुपैयाँ योगदान गर्ने र हरेक बीवाईडी गाडी विक्रीबापत १० हजार रुपैयाँ फाउन्डेसनमा जम्मा गर्ने कम्पनीले जानकारी दिएको छ । घोषणा कार्यक्रममा बीवाईडी एसिया प्यासिफिक अटो सेल्स डिभिजनका जनरल म्यानेजर लिउ स्वेलियाङले ग्राहकले किन्ने प्रत्येक बीवाईडी गाडीबापत १० हजार रुपैयाँ फाउन्डेसनलाई उपलब्ध गराउने घोषणा गरे । यो पहलले कुनै पनि कार्यमा महत्त्वपूर्ण प्रभाव पार्ने गरी समुदायलाई संलग्न गराउने बीवाईडी र साइमेक्सको सामूहिक उद्देश्यलाई पूरा गर्ने बताइएको छ ।

साइमेक्स इंकका अध्यक्ष अनिल श्रेष्ठले फाउन्डेसन शुरुआतका लागि साइमेक्सले १ करोड रुपैयाँ योगदान गर्ने घोषणा गरे । शिक्षा, स्वास्थ्य सेवा र दिगो विकास जस्ता समाजमा भएका सबैभन्दा ठूला चुनौतीलाई सम्बोधन गर्ने कार्यमा फाउन्डेसन केन्द्रित हुुने उनले जानकारी दिए । यसरी जम्मा गरिएको सहयोग रकम र अन्य सामूहिक प्रयास नेपाली नागरिकको जीवनस्तर सुधार गर्न र राष्ट्रको प्रगतिमा योगदान पुर्‍याउन समर्पित गरिने बताइएकोे छ । 

बीवाईडी नेपालका ब्राण्ड एम्बासडर हरिवंश आचार्यले साइमेक्स इंक र बीवाईडीले समुदायमा वास्तविक फरकपनको अनुभव गराउन गरेको अर्थपूर्ण पहलका लागि कृतज्ञता ज्ञापन गरे । बीवाईडी एसिया प्यासिफिक अटो सेल्स डिभिजनका जनरल म्यानेजर लिउले फाउन्डेसन सामान्य पहल मात्र नभई सबैको सुन्दर भविष्यका लागि कम्पनीको प्रतिबद्धता समेत भएको बताए ।