काठमाडौं । चालू आर्थिक वर्ष (आव)को तेस्रो त्रैमाससम्म नेपाल स्टक एक्सचेञ्ज (नेप्से)मा सचीकृत १६ विकास बैंकमध्ये सातओटाको वितरणयोग्य नाफा ऋणात्मक रहेको छ । 

विकास बैंकहरूले सार्वजनिक गरेको चालू आवको तेस्रो त्रैमासिक वित्तीय विवरणअनुसार सप्तकोशी डेभलपमेन्ट बैंक, ज्योति विकास बैंक, एक्सेल डेभलपमेन्ट बैंक, सिन्धु विकास बैंक, सांग्रिला डेभलपमेन्ट बैंक, कर्णाली डेभलपमेन्ट बैंक र नारायणी डेभलपमेन्ट बैंकको वितरणयोग्य नाफा ऋणात्मक रहेको हो । यस आधारमा यस आर्थिक वर्षमा यी सात बैंकले लाभांश दिन नसक्ने अवस्थामा देखिएका छन् । अन्तिम त्रैमाससम्म पनि यी कम्पनीको आर्थिक अवस्था सुधार नभए लगानीकर्ताको हात खाली हुने देखिन्छ । 

एनएफआरएस प्रणालीअनुसार कम्पनीले आर्जन गरेको खुद नाफालाई विभिन्न शीर्षकमा छ्ट्याएपछिको नाफा वितरणयोग्य नाफा हो । यस नाफाबाट कम्पनीले आफ्ना शेयरधनीलाई लाभांश वितरण गर्ने गर्दछ । 

गत वर्षको नाफाबाट पनि धेरै बैंक तथा वित्तीय संस्थाले आफ्ना शेयरधनीलाई लाभांश दिएका थिएनन् । तेस्रो त्रैमासिक वित्तीय विवरणलाई हेर्ने हो भने अहिले पनि ती बैंक तथा वित्तीय संस्था लाभांश दिन सक्ने अवस्थामा छैनन् । यद्यपि चौथो त्रैमासिक वित्तीय विवरण आउन बाँकी रहेकाले त्यो बेलासम्म यी कम्पनीको वित्तीय अवस्था सुधार हुन पनि सक्छ । 

तेस्रो त्रैमासिक वित्तीय विवरणअनुसार सूचीकृत १६ विकास बैंकमध्ये कर्पोरेट डेभलपमेन्ट बैंकले आफ्नो वित्तीय विवरणमा वितरणयोग्य नाफा उल्लेख गरेको छैन । बाँकीमध्ये कामना सेवा बैंकको वितरणयोग्य नाफा सबैभन्दा बढी छ । यस बैंकको वितरणयोग्य नाफा तेस्रो त्रैमाससम्ममा रू. २८ करोड ७३ लाख छ । वितरणयोग्य नाफा सर्वाधिक हुने विकास बैंकमा दोस्रोमा शाइन रेसुङ्गा डेभलपमेन्ट बैंक छ । बैंकको वितरणयोग्य नाफा रू. १४ करोड ८८ लाख रहेको छ । 

वितरणयोग्य नाफा ऋणात्मक रहेका विकास बैंकमध्ये सप्तकोशी डेभलपमेन्ट बैंकको सबैभन्दा बढी छ । उक्त बैंकको वितरणयोग्य नाफा रू. ४७ करोड ८७ लाख ऋणात्मक छ । त्यस्तै ज्योति विकास बैंकको वितरणयोग्य नाफा रू. २८ करोड ६६ लाख ऋणात्मक  छ । 

शेयर मूल्य भने नारायणी डेभलपमेन्ट बैंकको सबैभन्दा बढी छ । बैंकको शेयर मूल्य प्रतिकित्ता रू. ५३६ छ । शेयर मूल्य सर्वाधिक हुने विकास बैंकको सूचीमा दोस्रोमा मितेरी डेभलपमेन्ट बैंक छ । बैंकको शेयर मूल्य प्रतिकित्ता रू.४८६ दशमलव ६ छ । शेयर मूल्य सबैभन्दा कम भने ज्योति विकास बैंकको छ । बैंकको शेयर मूल्य प्रतिकित्ता रू. २९५ छ । 

विकास बैंकको वितरणयोग्य नाफा र बिहीवारको शेयर मूल्य

कम्पनीको नाम	वितरणयोग्य नाफा रू हजारमा	बिहीवारको शेयर मूल्य रू
कामना सेवा विकास बैंक	287,331	371
शाइन रेसुङ्गा डेभलपमेन्ट बैंक	148,885	391
गरिमा विकास बैंक	98,794	364
महालक्ष्मी विकास बैंक	98,605	328
लुम्बिनी विकास बैंक	78,341	372
मितेरी डेभलपमेन्ट बैंक	54,000	486.6
मुक्तिनाथ विकास बैंक	10,286	347
ग्रीन डेभलपमेन्ट बैंक	3,921	433
नारायणी डेभलपमेन्ट बैंक	-4,271	536
कणाली डेभलपमेन्ट बैंक	-25,134	425
सांग्रिला डेभलपमेन्ट बैंक	-60,194	318
सिन्धु विकास बैंक	-73,315	384.6
एक्सेल डेभलपमेन्ट बैंक	-83,152	391.4
ज्योति विकास बैंक	-286,658	295.9
सप्तकोशी डेभलपमेन्ट बैंक	-478,773	323
कर्पोरेट डेभलपमेन्ट बैंक	-	469

स्रोत : तेस्रो त्रैमासिक वित्तीय विवरण र नेप्से ।