काठमाडौं। धितोपत्रको दोस्रो बजार सञ्चालक नेपाल स्टक एक्सचेन्ज लिमिटेड (नेप्से) को प्रमुख कार्यकारी अधिकृत (सीईओ) मा चूडामणि चापागाईं नियुक्त भएका छन् । चैत १८ गते सोमवार बसेको मन्त्रिपरिषद् बैठकले उनलाई नेप्सेको सीईओ नियुक्त गर्ने निर्णय गरेको हो । उनले मंगलवार नियुक्तिपत्र बुझिसकेका छन् । यसअघि चैत ११ गते बसेको मन्त्रिपरिषद् बैठकले पाँच जनाको संक्षिप्त सूचीमा दोस्रो नम्बरमा रहेका नारदकुमार लुइँटेललाई नियुक्त गर्ने निर्णय गरेको समाचार मन्त्रीहरूलाई उद्धृत गर्दै सार्वजनिक भएको थियो । चापागाईं पाँच जनाको संक्षिप्त सूचीमा पहिलो नम्बरमै थिए ।

नवनियुक्त सीईओ चापागाईंसँग बीमा र बैंकिङ क्षेत्रमा काम गरेको अनुभव छ । सानिमा बैंकमा शाखा प्रबन्धकका रूपमा काम गरेको चापागाईंले युनियन लाइफ इन्स्योरेन्समा सहायक महाप्रबन्धक र सानिमा रिलायन्स लाइफ इन्स्योरेन्समा नायब महाप्रबन्धको रुपमा काम गरेका थिए । गत माघ २५ गतेदेखि रिक्त रहेको नेप्से सीईओ पदका लागि १० जनाको आवेदन परेको थियो । चापागाईंसँगै नेप्सेका पूर्वसीईओ कृष्णबहादुर कार्की, सिडिएस एन्ड क्लियरिङ लिमिटेड (सीडीएससी) का पूर्वसीईओ पूर्णप्रसाद आचार्य, बद्रीप्रसाद प्याकुरेल, नारदकुमार लुइँटेल, युवराज दाहाल, प्रवीण अधिकारी, विमलकुमार तिवारी, हेमन्त बस्याल र मुकुन्दराज जोशीले आवेदन दिएका थिए । 

नवनियुक्त सीईओसामु निकै चुनौती छन् । यतिबेला नेप्से साना तथा मझौला उद्योगका लागि बनाउन लागेको ‘एसएमई प्लेटफर्म’ सञ्चालनको गृहकार्य गरिरहेको छ । नेपाल धितोपत्र बोर्डले लागू गरेको नियमावलीबमोजिम एसएमई प्लेटफर्म सञ्चालन गर्न सीईओको भूमिका महत्त्वपूर्ण हुनेछ । निजीक्षेत्रको नयाँ स्टक एक्सचेन्जलाई अनुमति दिने तयारी भइरहेको बेला नेप्सेले प्रतिस्पर्धी रूपमा अघि बढ्नुपर्नेछ । ३ अर्ब रुपैयाँ पूँजीको दोस्रो स्टक एक्सचेन्जलाई अनुमति दिने तयारी भइरहँदा सरकारी स्वामित्वको नेप्सेले पनि पूँजी बढाउनुपर्नेछ । नेप्सेको हालको चुक्ता पूँजी १ अर्ब रुपैयाँ छ । नयाँ सूचकांक (इन्डेक्स) नेप्से ३० को सम्पूर्ण तयारी पूरा भए पनि त्यसलाई कार्यान्वयनमा ल्याउन सकेको छैन । यसलाई पनि उनले सम्बोधन गर्नुपर्नेछ ।