काठमाडौं । नुवाकोटको शिवपुरीमा दुर्घटनाग्रस्त एयर डाइनेष्टीको हेलिकप्टर उडेको ३ मिनेटमै सम्पर्कविहीन भएको नेपाल नागरिक उड्डयन प्राधिकरणले जनाएको छ ।
प्राधिकरणले आज (बुधवार) जारी गरेको प्रेस विज्ञप्तिमा यस्तो उल्लेख छ । ‘...सो हेलिकप्टर उडान गरेको ३ मिनेटपछि काठमाडौं टावरसँग सम्पर्कविच्छेद भई काठमाडौं जिल्ला शिवपुरी गाउँपालिका वडा नं. ७ सूर्याचौर भन्ने स्थानमा दुर्घटनामा परेको पुष्टि भएको,’ प्राधिकरणले जारी गरेको प्रेस विज्ञप्तिमा उल्लेख छ ।
उक्त दुर्घटनामा चालकसहित ५ जनाको मृत्यु भएको छ । प्राधिकरणले जारी गरेको प्रेस विज्ञप्तिअनुसार मृतकको शव परीक्षणका लागि काठमाडौंको महाराजगन्जस्थित त्रिवि शिक्षण अस्पताल ल्याइँदै छ ।
नाइन एन–एजेडी कल साइनको उक्त हेलिकप्टर काठमाडौंबाट रसुवाको स्याप्रुवेशीका लागि आज दिउँसो १ः५४ बजे उडेको थियो ।
