काठमाडौं । नेपाल स्टक एक्सचेन्ज लिमिटेड (नेप्से) मा सूचीकृत उत्पादनमूलक (म्यानुफ्याक्चरिङ) क्षेत्रका नौ कम्पनीमध्ये चारओटा चालू वर्षको दोस्रो त्रैमाससम्म घाटामा छन् ।
चालू आर्थिक वर्ष (आव) २०८१/८२ को दोस्रो त्रैमाससम्ममा बोटलर्स नेपाल (तराई), सोनापुर मिनरल्स एन्ड आयल, बोटलर्स नेपाल (बालाजु) र घोराही सिमेन्ट घाटामा रहेको सम्बद्ध कम्पनीले प्रकाशित गरेको वित्तीय विवरणमा उल्लेख छ ।
युनिलिभर नेपाल, हिमालयन डिस्टिलरी, सर्वोत्तम सिमेन्ट, शिवम् सिमेन्ट र नेपाल ल्युब आयल भने नाफामा सञ्चालित छन् ।
घोराही सिमेन्ट सर्वाधिक ६६ करोड ७१ लाख रुपैयाँ घाटामा छ । यस कम्पनीको आम्दानी सामान्य वृद्धि भए पनि वित्तीय खर्च बढेका कारण बढी घाटामा गएको वित्तीय विवरणले देखाउँछ । गत आवको ६ महीनासम्ममा कम्पनीको वित्तीय खर्च २६ करोड ५६ लाख रहेकोमा चालू वर्ष सोही अवधिमा बढेर ४८ करोड ७ लाख रुपैयाँ पुगेको छ ।
कोकाकोला, फन्टा र स्प्राइटजस्ता पेय पदार्थ बोटलिङ गर्ने बोटलर्स नेपाल (बालाजु) दोस्रो धेरै घाटामा रहेको कम्पनीमा पर्छ । उक्त कम्पनी चालू वर्षको दोस्रो त्रैमाससम्ममा २४ करोड ५० लाख रुपैयाँ घाटामा छ ।
बोटलर्स नेपाल (तराई) पनि ११ करोड ८९ लाख घाटामा छ । अघिल्लो आवको दोस्रो त्रैमासमा पनि यो कम्पनी ७ करोड ४१ लाख रुपैयाँ घाटामा थियो । चालू वर्ष यस कम्पनीको सञ्चालन आम्दानी (व्यापार) गत वर्षको तुलनामा १९ दशमलव ५१ प्रतिशत घटेको छ । उत्पादिन वस्तु बजारमा कम विक्री हुँदा कम्पनीको आम्दानीमा संकुचन आएको हो ।
सोनापुर मिनरल्स दोस्रो त्रैमाससम्ममा १२ करोड २० लाख रुपैयाँ घाटामा छ । तर यो नोक्सानी केही घटेको पनि छ । गत आवको सोही अवधिमा कम्पनीको घाटा १४ करोड ७८ लाख रुपैयाँ थियो ।
सञ्चालन आम्दानी बढेकाले कम्पनीको घाटामा सुधार आएको हो । गत आवको दोस्रो त्रैमासमा ७० करोड ५६ लाख आम्दानी गरेकोमा चालू वर्षको सोही अवधिमा बढाएर आम्दानी ९१ करोड ५८ लाख रुपैयाँ पुर्याएको छ ।
नाफामा रहेका ५ कम्पनीमध्ये शिवम् सिमेन्टको नाफा गतवर्ष पहिलो ६ महीनाको तुलनामा यस वर्ष ६१ दशमलव ७७ प्रतिशत घटेको छ भने बाँकी युनिलिभर नेपाल, हिमालयन डिस्टिलरी, सर्वोत्तम सिमेन्ट र नेपाल ल्युब आयलको नाफा वृद्धि भएको छ ।
प्रतिशतका आधारमा सबैभन्दा धेरै सर्वोत्तम सिमेन्टको नाफा ६८९ प्रतिशत बढेको छ । गतवर्ष दोस्रो त्रैमाससम्ममा यस कम्पनीले ३ करोड ५ लाख रुपैयाँ नाफा कमाएकोमा यस वर्ष बढाएर २४ करोड १४ लाख रुपैयाँ पुर्याएको छ । कम्पनीको सञ्चालन आम्दानी बढेको र वित्तीय खर्च घटेका कारण खुद नाफा उल्लेख्य बढ्न पुगेको हो ।
| कम्पनी | खुद नाफा (रू. हजार) | घटबढ प्रतिशत | सञ्चालन आम्दानी (रू. हजार) | घटबढ प्रतिशत | ||
| चालू आवको दोस्रो त्रैमास | गत आवको दोस्रो त्रैमास | चालू आवको दोस्रो त्रैमास | गत आवको दोस्रो त्रैमास | |||
| युनिलिभर नेपाल | 477,800 | 421,000 | 13.49 | 1,945,600 | 1,845,700 | 5.41 |
| हिमालयन डिस्टिलरी | 404,919 | 163,655 | 147.42 | 3,032,232 | 1,898,816 | 59.69 |
| सर्वोत्तम सिमेन्ट | 241,405 | 30,587 | 689.24 | 3,982,254 | 2,929,448 | 35.94 |
| शिवम् सिमेन्ट | 56,810 | 148,597 | -61.77 | 3,101,696 | 3,519,981 | -11.88 |
| नेपाल ल्युब आयल | 21,962 | 7,865 | 179.24 | 549,671 | 517,645 | 6.19 |
| घोराही सिमेन्ट | -667,103 | -418,438 | - | 1,731,953 | 1,712,494 | 1.14 |
| बोटलर्स नेपाल (बालाजु) | -245,042 | -151,578 | - | 4,364,352 | 4,583,125 | -4.77 |
| सोनापुर मिनरल्स एन्ड आयल | -122,085 | -147,853 | - | 915,805 | 705,698 | 29.77 |
| बोटलर्स नेपाल (तराई) | -118,941 | -74,155 | - | 2,968,695 | 3,688,350 | -19.51 |
स्रोत : सम्बद्ध कम्पनीको वित्तीय विवरण ।
