काठमाडौं । गत आर्थिक वर्षको चौथो त्रैमाससम्म राधी विद्युत कम्पनी लिमिटेडले ७ करोड ७१ लाख रुपैयाँभन्दा बढी वित्तीय आम्दानी गरेको छ । अघिल्लो वर्षको सोही अवधिसम्मको तुलनामा कम्पनीको वित्तीय आम्दानी उल्लेख्य मात्रामा बढेको हो ।अघिल्लो वर्ष यस अवधिसम्म कम्पनीले ३४ लाख रुपैयाँभन्दा बढी मात्र वित्तीय आम्दानी गरेको थियो ।

वित्तीय आम्दानी उल्लेख्य मात्रामा बढाएको कम्पनीको खुद नाफा अघिल्लो वर्षभन्दा १२१ दशमलव ३३ प्रतिशत बढेको छ । अघिल्लो वर्ष ५ करोड ९ लाख रुपैयाँभन्दा बढी खुद नाफा गरेको कम्पनीले गत वर्ष ११ करोड २७ लाख रुपैयाँभन्दा बढी खुद नाफा गरेको हो ।

कम्पनीको विद्युत विक्री आम्दानी भने अघिल्लो वर्षभन्दा करिब ५ प्रतिशत कम १२ करोड ८४ लाख रुपैयाँभन्दा बढी भएको छ । वित्तीय खर्च भने अघिल्लो वर्षभन्दा करीब ३३ प्रतिशत कम अर्थात् १ करोड ४२ लाख रुपैयाँभन्दा बढी भएको छ ।

हाल कम्पनीको चुक्ता पूँजी १ अर्ब ६७ करोड ५९ लाख ७९ हजार रुपैयाँ छ । अदर इक्वीटी अघिल्लो वर्षभन्दा करीब १५८ प्रतिशत बढी अर्थात् ३४ करोड ४३ लाख रुपैयाँभन्दा बढी कायम भएको छ । दीर्घकालीन कर्जा ९ करोड ७३ लाख रुपैयाँभन्दा बढी रहेको कम्पनीको अल्पकालीन कर्जा ५ करोड ७ लाख रुपैयाँभन्दा बढी छ । वार्षिक ६ रुपैयाँ ७३ पैसा प्रतिशेयर आम्दानी रहेको कम्पनीको प्रतिशेयर नेटवर्थ १२० रुपैयाँ ५४ पैसा छ ।