काठमाडौं । नेपाल स्टक एक्सचेन्ज नेप्सेमा सूचीकृत १९ वाणिज्य बैंकहरूमध्ये ७ बैंकले गत आर्थिक वर्ष (आव) २०८०/८१ सम्मको मुनाफाबाट लाभांश घोषणा गरेका छन् । स्ट्याण्डर्ड चार्टर्ड बैंक, एभरेष्ट बैंक, नबिल बैंक, ग्लोबल आइएमई बैंक, सानिमा बैंक, प्राइम कमर्सियल बैंक र सिटिजन्स बैंक इन्टरनेशनले बैंकले गत आवको मुनाफाबाट शेयरधनीलाई लाभांश वितरण गर्ने घोषणा गरेका हुन । 

यी मध्ये  एभरेष्ट बैंक र सिटिजन्स बैंकले साधारण सभाबाट लाभांश  पारित गरिसकेका छन् । एभरेष्ट बैंकले नगद लाभांश सम्बन्धीत शेयरधनीको बैंक खातामा पठाइसकेको छ । ७ वाणिज्य बैंकमध्ये सबैभन्दा बढी स्ट्याण्डर्ड चार्टर्ड बैंकले कुल २५ दशमलव ५ प्रतिशत लाभांश वितरण गर्ने घोषणा गरेको छ । बैंकले ६ दशमलव ५ प्रतिशत बोनस शेयर र १९ प्रतिशत नगद लाभांश कर सहित गरेर कुल २५ दशमलव ५ प्रतिशत लाभांश वितरण गर्ने घोषणा गरेको हो । अघिल्लो आवको मुनाफाबाट बैंकले गत वर्ष शेयरधनीलाई १९ प्रतिशत नगद लाभांश मात्रै वितरण गरेको थियो । यस आधारमा यस बैंकको लाभांश दर गत वर्ष भन्दा यस वर्ष बढेको छ भने बाँकी सबै बैंकको लाभांश दर घटेको छ । 

त्यस्तै दोस्रोमा एभरेष्ट बैंकले गत आवको मुनाफाबाट शेयरधनीलाई १० प्रतिशत बोनस शेयर ५ दशमलव ५३ प्रतिशत नगद लाभांश सहित कुल १५ दशमलव ५३ प्रतिशत लाभांश वितरण गर्ने घोषणा गरेको हो । अघिल्लो आवको मुनाफाबाट बैंकले गत वर्ष शेयरधनीलाई १० प्रतिशत बोनस शेयर र १० दशमलव ५३ प्रतिशत नगद लाभांश गरी कुल २० दशमलव ५३ प्रतिशत लाभांश वितरण गरेको थियो । बैंकले साधारण सभाबाट लाभांश पारित गरिसकेको छ । 

नबिल बैंकले गत आवको मुनाफाबाट शेयरधनीलाई १० प्रतिशत नगद लाभांश वितरण गर्ने घोषणा गरेको छ । हालसम्ममा यस बैंकले साधारण सभाको सूचना जारी गरेको छैन । अघिल्लो आवको मुनाफबाट बैंकले गत वर्ष शेयरधनीलाई ११ प्रतिशत नगद लाभांश वितरण गरेको थियो । 

त्यस्तै ग्लोबल आइएमई बैंकले गत आवको मुनाफाबाट हाल कायम चुक्ता पूँजीको ५ दशमलव ५ प्रतिशत बोनस शेयर वितरण गर्ने घोषणा गरेको छ । यस बैंकले पनि हालसम्ममा साधारण सभाको सूचना जारी गरेको छैन । अघिल्लो आवको मुनाफाबाट बैंकले गत वर्ष १ प्रतिशत बोनस शेयर र ८ प्रतिशत नगद लाभांश गरेर कुल ९ प्रतिशत लाभांश वितरण गरेको थियो । 

सानिमा बैंकले ५ दशलमव २६३२ प्रतिशत नगद लाभांश कर सहित वितरण गर्ने घोषणा गरेको छ । यो प्रस्ताव पारितका लागि बैंकले मङ्सिर ४ गते २०औं वार्षिक साधारण सभा बोलाएको छ । सभा आम्रपाली ब्यांक्वेट भाटभटेनीमा हुनेछ । साधारण सभा प्रयोजनको लागि बैंकले कात्तिक २५ गते एक दिन बुक क्लोज गर्ने निर्णय गरेको छ । बुक क्लोजको आधारमा कात्तिक २१ गते अर्थात भोलि सम्म कायम शेयरधनीले साधारण सभामा भाग लिन र लाभांश पाउन योग्य हुनेछन् ।  बैंकले अघिल्लो आवको मुनाफाबाट गत वर्ष ९ प्रतिशत बोनस शेयर र ५ दशमलव ७ प्रतिशत  नगद लाभांश गरेर कुल १४ दशमलव ७ प्रतिशत लाभांश वितरण गरेको थियो । 

प्राइम कमर्सियल बैंकले ५ प्रतिशत नगद लाभांश कर सहित वितरण गर्ने घोषणा गरेको छ । हालसम्ममा बैंकले साधारण सभाको मिति तय गरेको छैन । बैंकले गत वर्ष कुनै पनि लाभांश वितरण गरेको थिएन । 

सिटिजन्स बैंकले गत आवको मुनाफाबाट शेयरधनीलाई ४ प्रतिशत बोनस शेयर र कर प्रयोजनको लागि शून्य दशमल २१ प्रतिशत नगद लाभांश गरी कुल ४ दशमलव २१ प्रतिशत लाभांश वितरण गर्ने घोषणा गरेको छ । यो प्रस्ताव साधारण सभाबाट पारित गरिसकेको छ । यस बैंकले अघिल्लो आवको मुनाफाबाट शेयरधनीलाई ५ दशमलव ७९ प्रतिशत नगद लाभांश वितरण गरेको थियो । 

कम्पनीको नाम	आव २०८० /८१ को लाभांश %			आव २०७९ /८० को लाभांश %
	बोनस शेयर	नगद लाभांश	कुल लाभांश	बोनस शेयर	नगद लाभांश	कुल लाभांश
स्ट्याण्डर्ड चार्टर्ड बैंक	6.5	19	25.5	-	19	19
एभरेष्ट बैंक	10	5.53	15.53	10	10.53	20.53
नबिल बैंक	-	10	10	-	11	11
ग्लोबल आइएमई बैंक	5.5		5.5	1	8	9
सानिमा बैंक	-	5.2632	5.2632	9	5.7	14.7
प्राइम कमर्सियल बैंक	-	5	5	-	-	-
सिटिजन्स बैंक इन्टरनेशनल	4	0.21	4.21		5.79	5.79
स्रोत : सम्बन्धित बैंकका प्रकाशित सूचनाबाट