काठमाडौं । यो साता धितोपत्र दोस्रो बजार सकारात्मक गतिमा अघि बढेको छ । गत साताको तुलनामा यो साता बजारका महत्त्वपूर्ण सबै परिसूचक सकारात्मक बनेका छन् ।

बजार सञ्चालक नेपाल स्टक एक्सचेञ्ज (नेप्से)ले उपलब्ध गराएको तथ्याङ्क अनुसार यो साता कुल बजार पूँजीकरण ५६ अर्ब २० करोड ८८ लाख रुपैयाँभन्दा बढीले वृद्धि भएको छ ।

गत साताको अन्तिम कारोबार दिन ४३ खर्ब ७ अर्ब ३५ करोड ७७ लाख रुपैयाँभन्दा बढी रहेको कुल बजार पूँजीकरण यो साताको अन्तिम कारोबार दिन ४३ खर्ब ६३ अर्ब ५६ करोड ६५ लाख रुपैयाँभन्दा बढी कायम भएको हो । प्रतिशतका हिसाबमा गत साताभन्दा यो साता कुल बजार पूँजीकरण १ दशमलव ३० प्रतिशत बढेको नेप्सेको तथ्याङ्कले देखाउँछ ।

सूचीकृत कम्पनीहरूको शेयर मूल्य बढेसँगै समग्र धितोपत्र कारोबार मापक नेप्से परिसूचकमा सकारात्मक प्रभाव परेको छ । गत साताको अन्तिम कारोबार दिन कायम भएको नेप्से परिसूचकको तुलनामा यो साताको अन्तिम कारोबार दिन कायम नेप्से परिसूचक ३३ दशमलव ८९ अंक बढेको छ । प्रतिशतका हिसाबमा नेप्से परिसूचक १ दशमलव ३१ प्रतिशत बढेको देखिन्छ ।

यो साता एक दिन सार्वजनिक बिदा परेकाले बजार चार कारोबार दिन मात्र खुला भएको थियो । पहिलो कारोबार दिन १३ दशमलव ५३ अंकले घटेको बजार दोस्रो दिन २८ दशमलव ९१ अंक, तेस्रो दिन १४ दशमलव ३१ अंक र तेस्रो दिन ४ दशमलव १९ अंक बढेको थियो । यो साताको अन्तिम तीन कारोबार दिन बजार निरन्तर बढेको हो । गत साताको अन्तिम कारोबार दिन २ हजार ५९६ दशमलव ८२ विन्दुमा रहेको नेप्से परिसूचक यो साताको अन्तिम कारोबार दिन २ हजार ६३० दशमलव ७१ विन्दुमा बन्द भएको छ ।

पछिल्लो समय अल्पकालीन लगानीकर्ता बजारमा सक्रिय रहेकाले केही समयपछिको नाफा बुकपछि पुनः लगानी गर्ने क्रम बढेको ब्रोकरहरू बताउँछन् । सानादेखि ठुला लगानीकर्तासम्म अहिले बजारमा केही सकारात्मक देखिएको बुझाइ ब्रोकरहरूको छ ।

लगानीकर्ता सकारात्मक बन्दा यो साता चार कारोबार दिनमा १९ अर्ब ४७ करोड ९९ लाख रुपैयाँभन्दा बढीको ५ करोड १८ लाखभन्दा बढी कित्ता धितोपत्र कारोबार भएको छ । गत साता चार कारोबार दिनमा १९ अर्ब ३० करोड ९१ लाख रुपैयाँभन्दा बढीको ३ करोड ९६ लाखभन्दा बढी कित्ता धितोपत्र कारोबार भएको थियो ।

कुल कारोबार रकम गत साताभन्दा यो साता शून्य दशमलव ८८ प्रतिशत र कुल कारोबार कित्ता ३० दशमलव ६३ प्रतिशत बढेको छ ।

औसतमा कारोबार रकम शून्य दशमलव ८८ प्रतिशत र कारोबार कित्ता ३० दशमलव ६३ प्रतिशत बढेको छ । यो साता औसतमा ४ अर्ब ८६ करोड ९९ लाख रुपैयाँभन्दा बढीको १ करोड २९ लाखभन्दा बढी कित्ता धितोपत्र कारोबार भएको नेप्सेको तथ्याङ्कले देखाउँछ । गत साता भने औसतमा ४ अर्ब ८२ करोड ७२ लाख रुपैयाँभन्दा बढीको ९९ लाख १६ हजारभन्दा बढी कित्ता मात्र धितोपत्र कारोबार भएको थियो ।

समग्र धितोपत्र कारोबार मापक नेप्से परिसूचक बढेको यो साता ठुला कम्पनीहरूको मात्र कारोबार मापक सेन्सेटिभ इन्डेक्स १ दशमलव २७ प्रतिशत बढेर ४५१ द्यशमलव ४५ विन्दु कायम भएको छ ।

सातागत परिसूचकको तुलना

विवरण	गत साता	अघिल्लो साता	फरक	फरक प्रतिशत
नेप्से परिसूचक (अंक)	२,६३०.७१	२,५९६.८२	३३.८९	१.३१
सेन्सेटिभ इन्डेक्स (अंक)	४५१.४५	४४५.७७	५.६८	१.२७
कारोबार रकम (रू. हजारमा)	१९,४७९,९४७.२०	१९,३०९,१८९.६५	१७०,७५७.५६	०.८८
कारोबार कित्ता	५१,८१४,९५८.००	३९,६६४,७५३.००	१२,१५०,२०५.००	३०.६३
औसत कारोबार रकम (रू. हजारमा)	४,८६९,९८६.८०	४,८२७,२९७.४१	४२,६८९.३९	०.८८
औसत कारोबार कित्ता	१२,९५३,७३९.५०	९,९१६,१८८.२५	३,०३७,५५१.२५	३०.६३
कुल बजार पूँजीकरण (रू. दश लाखमा)	४,३६३,५६६.५८	४,३०७,३५७.७३	५६,२०८.८५	१.३

स्रोत : नेपाल स्टक एक्सचेञ्ज (नेप्से)

जलविद्युत र बैंकिङ समूहका लगानीकर्ताले सर्वाधिक कमाए

यो साता पाँच समूहगत परिसूचक घटेका छन् । यो साता म्युचुअल फण्डको ४ दशमलव ६९ प्रतिशत, विकास बैंकको १ दशमलव ६९ प्रतिशत, वित्तको शून्य दशमलव ९७ प्रतिशत, निर्जीवन बीमाको शून्य दशमलव ४२ प्रतिशत र जीवन बीमाको परिसूचक शून्य दशमलव १० प्रतिशत घटेको हो ।

यो साता परिसूचकमा आएको वृद्धिका आधारमा जलविद्युत् र बैंकिङ समूहका लगानीकर्ताले सर्वाधिक कमाएको देखिन्छ । यो साता जलविद्युत् समूहको परिसूचक २ दशमलव ७३ प्रतिशत र बैंकिङ समूहको परिसूचक २ दशमलव ५६ प्रतिशत बढेको छ ।

त्यस्तै लघुवित्तको १ दशमलव ६१ प्रतिशत, उत्पादन तथा प्रशोधनको १ दशमलव ५९ प्रतिशत, व्यापारिकको शून्य दशमलव ९३ प्रतिशत, अन्यको शून्य दशमलव ५९ प्रतिशत, लगानीको शून्य दशमलव ५८ प्रतिशत र होटल तथा पर्यटन समूहको परिसूचक शून्य दशमलव ४२ प्रतिशत बढेको छ ।

साताव्यापी समूहगत परिसूचकमा आएको परिवर्तन

विवरण	यो साता	गत साता	फरक प्रतिशत
जलविद्युत्	३,४९४.९८	३,४०२.२३	२.७३
बैंकिङ्ग	१,४२७.९१	१,३९२.३१	२.५६
लघुवित्त	४,९२२.४७	४,८४४.५०	१.६१
उत्पादन तथा प्रशोधन	६,८१७.८१	६,७११.१५	१.५९
व्यापारिक	४,७१८.८५	४,६७५.२८	०.९३
अन्य	१,९४०.६१	१,९२९.३१	०.५९
लगानी	९९.४२	९८.८५	०.५८
होटल तथा पर्यटन	६,४२७.१४	६,३९९.९६	०.४२
जीवन बीमा	१२,४९३.७३	१२,५०६.४८	-०.१
निर्जीवन बीमा	१२,४६०.४२	१२,५१२.५८	-०.४२
वित्त	३,०७३.२५	३,१०३.३०	-०.९७
विकास बैंक	५,३६६.११	५,४५८.५९	-१.६९
म्युचुअल फण्ड	२०.३	२१.३	-४.६९

स्रोत : नेपाल स्टक एक्सचेञ्ज (नेप्से)