असार ३०, काठमाडौं । अपर सोलु हाइड्रो इलेक्ट्रिक कम्पनी लिमिटेडले सर्वसाधारणमा सार्वजनिक निष्काशन गरेको आईपीओ बाँडफाँट भएको छ । विक्री प्रबन्धक एनएमबी क्यापिटलले बिहीवार बिहान आईपीओ बाँडफाँड गरेको हो ।

कम्पनीले सर्वसाधारणका लागि असार २० गतेदेखि २३ गतेसम्म १८ लाख २० हजार ४७५ कित्ता आईपीओ सार्वजनिक निष्कासन गरेको थियो । विक्री प्रबन्धकका अनुसार उक्त आईपीओ खरिदका लागि १४ लाख ४६ हजार ९८५ जनाले १ करोड ६१ लाख ८६ हजार ५ सय ५० कित्ताको लागि आवेदन दिएका थिए । जसमध्ये १ हजार ७ सय ९१ जनाको आवेदन रितपूर्वक नभएकाले रद्द गरिएको छ । रितपूर्वक आवेदन दिएका योग्य १४ लाख ४५ हजार १९४ जना आवेदकहरूलाई गोलाप्रथामा समावेश गराएर आईपीओ बाँडफाँड गरिएको हो ।

हालको बाँडफाँटको व्यवस्था अनुसार पहिलो चरणमा १ लाख ८२ हजार ४७ जनालाई १० कित्ता शेयर बाँडफाँट गरिएको छ । यसरी बाँडफाँट गरी बाँकी रहेको ५ कित्ता शेयर थप पाँच जनालाई १-१ कित्ताका दरले बाँडफाँट गरिएको छ । यसरी हेर्दा ५ जना आवेदकले ११ कित्तासम्म शेयर हात पारेका छन् । यस आईपीओमा आवेदन दिएकामध्ये १२ लाख ६४ हजारभन्दा बढी आवेदककाे हात खाली भएको छ ।

सार्वजनिक निष्कासनमार्फत विक्री गरेकोसहित कम्पनीले सर्वसाधारणमा रू. १९ करोड ५७ लाख ५० हजार बराबरको १९ लाख ५७ हजार ५०० कित्ता आईपीओ वितरण गर्न लागेको हो । कुल कित्तामध्ये कम्पनीले २ प्रतिशत अर्थात् ३९ हजार १५० कित्ता कर्मचारीहरूका लागि सुरक्षित गरेको छ भने ५ प्रतिशत अर्थात् ९७ हजार ८७५ कित्ता सामूहिक लगानी कोषहरूमा बाँडफाँट गरेको छ ।

यस कम्पनीले सोलुखुम्बु जिल्लामा २३ दशमलव ५ मेगावाट क्षमताको सोलु जलविद्युत आयोजना निर्माण सम्पन्न गरी उत्पादन गरिरहेको छ । उक्त आयोजनाबाट उत्पादित विद्युत २०७८ फागुन ७ गतेदेखि राष्ट्रिय प्रशारण प्रणालीमार्फत पूर्णरूपमा विक्री भइरहेको छ ।

हाल कम्पनीमा संस्थापकतर्फ चुक्ता भएको ७५ दशमलव ५ प्रतिशत शेयरपूँजी रू. १ अर्ब १ करोड ९२ लाख ५० हजार छ । आयोजना प्रभावित स्थानीयमा १० प्रतिशत शेयर विक्री गरिसकेको कम्पनीले सर्वसाधारणमा १४ दशमलव ५ प्रतिशत शेयर विक्रीपश्चात चुक्ता पूँजी रू. १ अर्ब ३५ करोड पुगेको छ । यस कम्पनीको आर्थिक वर्ष ०७७/७७ सम्म सञ्चित नाफा रू. ८ करोड ३६ लाखभन्दा बढी छ । सो अवधिसम्म कम्पनीको प्रतिशेयर आम्दानी रू. ४ दशमलव २१ र प्रतिशेयर नेटवर्थ रू. १०८ दशमलव २१ छ ।

कम्पनीको आईपीओले धितोपत्र दोस्रो बजारमा पहिलो कारोबारका लागि वास्तविक प्रतिशेयर नेटवर्थदेखि त्यसको तीनगुणासम्मको मूल्य रेञ्ज पाउनेछ ।

Upper Solu Hydro Electric Company (USHEC)

Upper Solu Hydro Electric Company (USHEC)