नयाँ दिल्ली (भारत) । भारतको प्रयागराजमा डेढ महीना चलेको ‘महाकुम्भ’ आज (बुधवार) सम्पन्न भएको छ । 

गत पुस २९ गते पूर्णिमाको दिन शुरु भएको महाकुम्भ आज (फागुन कृष्ण त्रयोदशी) महाशिवरात्रिको दिन सम्पन्न भएको हो । 

भारतीय समाचार संस्था एनडीटीभीका अनुसार महाकुम्भमा ६३ करोडभन्दा बढी श्रद्धालुले गंगा, यमुना र पौराणिक अदृश्य सरस्वती नदीको संगममा स्नान गरेका छन् । 

हिन्दु धर्मावलम्बीहरूको यो मेला विश्वकै सबैभन्दा ठूलो मेला भएको दाबी गरिएको छ । 

प्रयागराजमा प्रत्येक १२ वर्षमा कुम्भ मेला आयोजना गरिन्छ । यसपटकको कुम्भलाई भने ‘महाकुम्भ’ भनिएको हो । यो कुम्भ १२ कुम्भपछि परेकाले ‘महाकुम्भ’ भनिएको हो ।