काठमाडौं । गार्डियन माइक्रो लाइफ इन्स्योरेन्सको शेयर लगातार दशौं कारोबार दिनसम्म सर्किट लेभलमा कारोबार भइरहेको छ । यस कम्पनीको शेयर मूल्य दोस्रो बजारमा कारोबार आएकै दिनदेखि १० प्रतिशतका दरले वृद्धि हुँदै आइतवार कम्पनीको शेयर मूल्य प्रतिकित्ता रू. ७८० दशमलव २० मा रुपैयाँमा कारोबार भइरहेको छ । 

नेपाल बीमा प्राधिकरणले लघु बीमाको छुट्टै कारोबार गर्ने उद्देश्यले जीवन र निर्जीवन गरी ७ वटा कम्पनीलाई कारोबार अनुमति दिएको थियो । गार्डियन माइक्रो लाइफले पहिलोपटक आईपीओ निष्कासन गरेर धितोपत्रको दोस्रो बजारमा माघ २७ गतेदेखि शेयर कारोबार शुरु गरेको हो । 

‘जीएमएलआई’ स्टक संकेत पाएको कम्पनीलाई नेप्सेले रू. १०० दशमलव ३४ देखि ३०१.०२ सम्ममा पहिलो कारोबार गर्न कारोबार रेञ्ज दिएको थियो । सोही मूल्यलाई आधारमा मानेर माथिल्लो मूल्यमा कम्पनीको शेयर कारोबार खुला भएको थियो । 

पछिल्लो समय कम चुक्ता पूँजी भएका कम्पनीको शेयर मूल्यमा लगानीकर्ताको बढी आकर्षण देखिन्छ । सेबोनको आइपीओ बाँडफाँट प्रणालीमा सबै लगानीकर्तासँग १० कित्ताभन्दा बढी शेयर नहुने हुँदा अहिले शेयरको आपूर्ति खासै नहुँदा यस कम्पनीको मूल्य बढ्ने क्रमले निरन्तरता पाएको देखियो । 

यस कम्पनीको कुल ७५ लाख कित्ता शेयर सूचीकृत रहेको छ । जसमध्ये २२ लाख ५० हजार कित्ता सर्वसाधारणको शेयर छ भने बाँँकी संस्थापकको छ ।