काठमाडौं । ङादी ग्रुप पावर लिमिटेडले पुस २३ गतेदेखि माघ २९ गतेसम्म निष्कासन गरेको शतप्रतिशत हकप्रद शेयर बाँडफाँट भएको छ ।

कम्पनीले तोकिएको अवधिभित्र रितपूर्वक आवेदन दिएका शेयरधनीहरूलाई फागुन १२ गते हकप्रद शेयर बाँडफाँट गरिएको हो । यस अवधिमा विक्री नभएको सर्वसाधारणतर्फको ८ लाख ७३ हजार ६१ दशमलव २२५ कित्ता शेयर भने कम्पनीले फागुन २० गतेदेखि लिलामी प्रक्रियाबाट विक्री गर्न लागेको छ ।

फागुन २८ गतेभित्र यी शेयर खरीद गर्न लगानीकर्ताहरूले गोप्य शिलबन्दी बोलपत्र पेश गर्न सक्नेछन् । प्रतिकित्ता १०० रुपैयाँ मूल्य तोकेर लिलामीमा आउने यी शेयर खरीदका लागि तोकिएको मूल्य वा सोभन्दा बढी मूल्य अंकित गरी न्यूनतम १०० कित्तादेखि अधिकतम सम्पूर्ण कित्तासम्म माग गर्न सकिनेछ ।

यो शेयर निष्कासन तथा विक्री प्रबन्धकमा सिद्धार्थ क्यापिटल लिमिटेड रहेको छ । कम्पनीले हाल कायम चुक्तापूँजी १ अर्ब ८५ करोड १२ लाख ७९ हजार २२२ रुपैयाँ ५० पैसाको आधारमा सोही बराबरको हकप्रद शेयर निष्कासन गरेको हो ।

विक्री नभएको उल्लेखित शेयर लिलामी प्रक्रियाबाट विक्री भएपछि कम्पनीको चुक्तापूँजी ३ अर्ब ७० करोड २५ लाख ५८ हजार ४४५ रुपैयाँ कायम हुनेछ ।