निर्जीवन बीमा कम्पनीहरूको व्यवसाय ९ प्रतिशत बढ्यो

काठमाडौं । चालू आर्थिक वर्षको पाँच महीनामा निर्जीवन बीमा कम्पनीहरूले कुल रू. १७ अर्ब १७ करोडभन्दा बढी बीमाशुल्क आर्जन गरेका छन् ।

नेपाल बीमा प्राधिकरणले सार्वजनिक गरेको तथ्यांक अनुसार सञ्चालनमा रहेका १४ निर्जीवन बीमा कम्पनीहरूले साउनदेखि मंसिरसम्ममा उक्त बीमाशुल्क आर्जन गरेका हुन् ।

निर्जीवन बीमा कम्पनीहरूले चालू आवको पाँच महीनामा आर्जन गरेको कुल बीमाशुल्क गत आर्थिक वर्षको तुलनामा ९ दशमलव २७ प्रतिशत बढी हो । यी कम्पनीहरूले गत आवको मंसिर मसान्तसम्ममा भने कुल रू. १५ अर्ब ७२ करोड बीमाशुल्क आर्जन गरेका थिए ।

चालू आवको पाँच महीनामा सबैभन्दा बढी बीमाशुल्क आर्जन गर्नेमा सगरमाथा लुम्बिनी जनरल इन्स्योरेन्स (सालिको) छ । यस कम्पनीले गत साउनदेखि मंसिर मसान्तसम्ममा रू. २ अर्ब १९ करोडभन्दा बढी बीमाशुल्क आर्जन गरेको हो । यो बीमाशुल्क गत आवको तुलनामा १० प्रतिशत वृद्धि भएको छ । गत आवमा कम्पनीले रू. १ अर्ब ९९ करोड बीमाशुल्क आर्जन गरेको थियो ।

चालू आवको पाँच महीनामा सर्वाधिक बीमाशुल्क संकलन गर्ने सूचीमा दोस्रोमा सिद्धार्थ प्रिमियम इन्स्योरेन्स कम्पनी छ । यो कम्पनीले मंसिर मसान्तसम्ममा रू. १ अर्ब ७६ करोड बीमाशुल्क आर्जन गरेको छ ।

प्रतिशतका आधारमा सबैभन्दा बढी बीमाशुल्क आर्जन गर्नेमा दि ओरियन्टल छ । यो कम्पनीको बीमाशुल्क ५४ दशमलव ९८ प्रतिशत वृद्धि भएको छ । गत आवको मंसिर मसान्तसम्ममा रू. ७२ करोड ७१ लाख बीमाशुल्क आर्जन गरेको उक्त कम्पनीले चालू आवको सोही अवधिमा रू. १ अर्ब १२ करोडभन्दा बढी आर्जन गरेको हो ।

यो आवको पाँच महीनामा १४ कम्पनीमध्ये दुई कम्पनीको बीमाशुल्क भने घटेको छ, जसमा युनाइटेड अजोड इन्स्योरेन्स र प्रभु इन्स्योरेन्स छन् । यस्तै १२ कम्पनीको बीमाशुल्क भने बढेको छ ।

कम्पनीको नाम	कुल बीमाशुल्क रू.लाखमा		घटबढ प्रतिशत
कम्पनीको नाम	२०८१ साउन–मंसिर	२०८० साउन–मंसिर	घटबढ प्रतिशत
सगरमाथा लुम्बिनी इन्स्योरेन्स	२१,९९८.३६	१९,९९७.०१	१०.०१
सिद्धार्थ प्रिमियर इन्स्योरेन्स	१७,६८५.८५	१६,५१९.१९	७.०६
शिखर इन्स्योरेन्स	१७,४२५.७४	१५,७७६.५३	१०.४५
आइजिआई प्रुडेन्सियल इन्स्योरेन्स	१४,५५२.७०	१३,८१२.०८	५.३६
नेको इन्सुरेन्स	१४,०३८.२१	१३,३३०.०६	५.३१
हिमालयन एभरेष्ट इन्स्योरेन्स	१४,००९.२५	१३,९५३.८५	०.४
एनएलजी इन्स्योरेन्स	११,३०६.०७	१०,१६४.३९	११.२३
दि ओरियन्टल	११,२६९.००	७,२७१.२५	५४.९८
युनाइटेड अजोड इन्स्योरेन्स	१०,२५५.६८	१०,७१२.३८	-४.२६
सानिमा जिआईसी इन्स्योरेन्स	९,९७४.५८	९,६८६.१०	२.९८
नेपाल इन्स्योरेन्स	९,४४६.९३	६,१९१.९०	५२.५७
प्रभु इन्स्योरेन्स	७,६६८.४२	८,४१४.१६	-८.८६
राष्ट्रिय बीमा कम्पनी	६,७११.८९	६,२६१.५१	७.१९
नेशनल इन्स्योरेन्स	५,४३४.९३	५,११९.७४	६.१६
कुल	१७१,७७७.६१	१५७,२१०.१५	९.२७

स्रोत : नेपाल बीमा प्राधिकरण