काठमाडौं । पुस महीनामा धितोपत्र दोस्रो बजारमा ८९ अर्ब २४ करोड ६३ लाख रुपैयाँभन्दा बढीको २० करोड २४ लाख ८८ हजार कित्ता धितोपत्र कारोबार भएको छ । नेपाल स्टक एक्सचेञ्ज (नेप्से)ले सार्वजनिक गरेको मासिक प्रतिवेदनमा उल्लेखित कारोबार भएको देखिएको हो । 

मंसिर महीनाको तुलनामा पुसमा कारोबार रकम र कित्ता घटेको देखिन्छ । नेप्सेका अनुसार मंसिरमा १ खर्ब ५१ अर्ब २ करोड ३२ लाख रुपैयाँ बराबरको ३१ करोड ३१ लाख ३७ हजार कित्ता धितोपत्र कारोबार भएको थियो । 

कुल कारोबारमा जलविद्युत समूहले नै सर्वाधिक हिस्सालाई निरन्तरता दिएको छ । धितोपत्र दोस्रो बजारमा सूचीकृत कम्पनीमध्ये जलविद्युत कम्पनीको संख्या बढी रहेको छ । 

नेप्सेमा २४४ कम्पनीको धितोपत्र सूचीकृत रहेकोमा जलविद्युत तर्फका मात्र ९१ कम्पनी रहेका छन् । कम पूँजी र धेरैजसो कम्पनीको कम मूल्य रहेको अवस्थामा लगानीकर्ता यो क्षेत्रको कम्पनीको शेयर खरीदमा बढी आकर्षित देखिन्छन् । 

पुसमा जलविद्युत कम्पनीहरूको ३६ अर्ब ६५ करोड रुपैयाँभन्दा बढीको ८ करोड १७ लाखभन्दा बढी कित्ता धितोपत्र कारोबार भएको छ । जलविद्युतपछि वित्त समूहको सर्वाधिक हिस्सा रहेको छ । यो महीना वित्त समूहको १० अर्ब १३ करोड रुपैयाँभन्दा बढीको १ करोड ४० लाखभन्दा बढी कित्ता धितोपत्र कारोबार भएको हो । 

रकममा हिसाबमा भने म्युचुअल फण्डको कम कारोबार भएको देखिन्छ । पुसमा म्युचुअल फण्डको ३१ करोड २९ लाख रुपैयाँभन्दा बढीको ३ करोड २१ लाख इकाई कारोबार भएको हो । 

समूह	कुल कारोबार रकम रू. दश लाख	कुल कारोबार कित्ता हजार
जलविद्युत	36,651.98	81,745.94
वित्त	10,134.31	14,073.43
विकास बैंक	8,317.46	11,845.66
वाणिज्य	7,853.75	28,609.87
लघुवित्त	7,427.79	5,254.53
लगानी	5,001.21	6,595.41
जीवन बीमा	3,256.69	5,658.04
उत्पादन तथा प्रशोधन	2,661.56	3,722.91
निर्जीवन बीमा	2,489.28	3,028.76
अन्य	2,151.57	2,759.02
होटल तथा पर्यटन	1,318.98	1,581.58
संस्थापक शेयर	889.9	5,059.55
ऋणपत्र	408.84	357.29
व्यापारिक	370.06	64.26
म्युचुअल फण्ड	312.92	32,132.62
कुल कारोबार	89,246.30	202,488.87

स्रोत : नेपाल स्टक एक्सचेञ्ज (नेप्से) ।