काठमाडौं । यो साता धितोपत्र दोस्रो बजार तीन दिन मात्र सञ्चालन भएको छ । सोमवादेखि बिहीवारसम्म पाँच कारोबार दिन खुला हुने बजार बुधवार र बिहीवार सार्वजनिक बिदाका कारण बन्द हुँदा तीन दिन मात्र कारोबार भएको हो । तीन दिनको कारोबारमा बजार दुई दिन निरन्तर घटेको थियो भने एक दिन बढेको थियो । 

पहिलो कारोबार दिन १० दशमलव ४१ अंकले र दोस्रो दिन १० दशमलव ४१ अंकले बजार घटेको थियो । तेस्रो दिन भने २४ दशमलव ५० अंकले बजार बढेर बन्द भएको छ । गत साताको अन्तिम कारोबार दिन पनि बजार ११ दशमलव १० अंकले घटेको थियो । 

निरन्तर तीन दिन घटेको बजार चौथो दिन भने बढेकाले बजार केही सुधारिने आशामा लगानीकर्ता देखिन्छन् । पछिल्लो समय थोरै समयमै बजारको वृद्धिले ब्रेक लगाउने गरेको देखिन्छ ।

लगानीकर्ता ढुक्क भएर कारोबार नगरेको अवस्थामा अल्पकालीन नाफा बुक हुने परिपाटी बढेको ब्रोकरहरू बताउँछन् । 

यो साता कुल कारोबार रकम ८ अर्ब ६२ करोड ३३ लाख रुपैयाँले घट्दा कुल कारोबार कित्ता १ करोड ८४ लाख २९ हजारभन्दा बढीले घटेको छ । यो साता तीन दिनको कारोबारमा २७ अर्ब ४५ करोड रुपैयाँभन्दा बढीको ५ करोड २६ लाख ५४ हजारभन्दा बढी कित्ता धितोपत्र खरीदविक्री भएको छ । गत साता पाँच कारोबार दिनमा ३६ अर्ब ७ करोड रुपैयाँभन्दा बढीको ७ करोड १० लाख ८३ हजारभन्दा बढी कित्ता धितोपत्र खरीदविक्री भएको थियो । 

कुल कारोबार रकम र कित्ता घटेपनि औसतमा भने कारोबार रकम र कित्ता दुबै बढेको छ । दुई दिन कम कारोबार भएको यो साता औसतमा कारोबार रकम १ अर्ब ९३ करोड ६० लाख रुपैयाँभन्दा बढीले वृद्धि भएको छ भने कारोबार कित्ता ३३ लाख ३४ हजारभन्दा बढीले वृद्धि भएको छ ।

तीन दिनको कारोबारमा कुल बजार पूँजीकरण ६ अर्ब ३८ करोड रुपैयाँले बढेको छ । गत साताको अन्तिम कारोबार दिन ४४ खर्ब २ अर्ब ७६ करोड ६६ लाख रुपैयाँभन्दा बढी रहेको कुल बजार पूँजीकरण पछिल्लो कारोबार दिन ४४ खर्ब ९ अर्ब १४ करोड ७६ लाख रुपैयाँ कायम भएको हो । 

सातागत परिसूचकको तुलना 

विवरण	यो साता	गत साता	फरक	फरक प्रतिशत
कारोबार रकम (रू. हजारमा)	27,455,417.44	36,078,736.08	-8,623,318.64	-23.9
कारोबार कित्ता	52,654,138.00	71,083,474.00	-18,429,336.00	-25.93
औसत कारोबार रकम (रू. हजारमा)	9,151,805.81	7,215,747.22	1,936,058.60	26.83
औसत कारोबार कित्ता	17,551,379.33	14,216,694.80	3,334,684.53	23.46
कुल बजार पूँजीकरण (रू. दश लाखमा)	4,409,147.67	4,402,766.69	6,380.98	0.14

स्रोत : नेपाल स्टक एक्सचेञ्ज (नेप्से)

व्यापारिक समूहले सर्वाधिक गुमाए 

यो साता तीन दिनको कारोबारमा व्यापारिक समूहले सर्वाधिक गुमाएको देखिन्छ । नेपाल स्टक एक्सचेञ्ज (नेप्से)को तथ्याङ्कलाई हेर्दा गत साताको अन्तिम कारोबार दिनको तुलनामा पछिल्लो तीन कारोबारपछिको परिसूचकलाई हेर्दा व्यापारिक समूहको परिसूचक २ दशमलव ३४ प्रतिशत घटेको छ । 

त्यस्तै जीवन बीमाको १ दशमलव ६४ प्रतिशत, बैंकिङको १ दशमलव २२ प्रतिशत, निर्जीवन बीमाको १ दशमलव शून्य ७ प्रतिशत, लगानीको शून्य दशमलव २६ प्रतिशत, होटल तथा पर्यटनको शून्य दशमलव २० प्रतिशत र म्युचुअल फण्डको शून्य दशमलव शून्य ५ प्रतिशत परिसूचक घटेको छ । 

पछिल्लो तीन कारोबार दिनको अवस्थालाई हेर्दा विकास बैंकका लगानीकर्ताले सर्वाधिक कमाएको देखिन्छ । विकास बैंक समूहको परिसूचक सर्वाधिक ५ दशमलव ४६ प्रतिशत, जलविद्युतको १ दशमलव २८ प्रतिशत, वित्तको शून्य दशमलव ३९ प्रतिशत, उत्पादन तथा प्रशोधनको शून्य दशमलव २३ प्रतिशत र अन्य समूहको परिसूचक शून्य दशमलव शून्य ९ प्रतिशत बढेको छ ।

साताव्यापी समूहगत परिसूचकमा आएको परिवर्तन

विवरण	यो साता	गत साता	फरक प्रतिशत
विकास बैंक	5,864.52	5,560.96	5.46
जलविद्युत्	3,795.56	3,706.62	2.4
लघुवित्त	4,965.81	4,903.00	1.28
वित्त	2,574.76	2,564.75	0.39
उत्पादन तथा प्रशोधन	7,096.55	7,080.55	0.23
अन्य	2,085.12	2,083.29	0.09
म्युचुअल फण्ड	20.08	20.09	-0.05
होटल तथा पर्यटन	6,815.79	6,829.26	-0.2
लगानी	104.06	104.33	-0.26
निर्जीवन बीमा	12,652.41	12,788.96	-1.07
बैंकिङ्ग	1,334.22	1,350.74	-1.22
जीवन बीमा	12,859.78	13,074.30	-1.64
व्यापारिक	4,356.70	4,460.99	-2.34

स्रोत : नेपाल स्टक एक्सचेञ्ज (नेप्से)