काठमाडौं। राष्ट्रिय वाणिज्य बैंक लिमिटेडले जुम्लाको सिंजा गाउँपालिकामा ‘किसान सरल कर्जा’ कार्यक्रम सञ्चालन गर्ने भएको छ । बैंक र पालिकाबीच किसान सरल कर्जा कार्यक्रम सञ्चालन गर्नेसम्बन्धी प्रारम्भिक सम्झौता भएको हो । सम्झौतापत्रमा बैंकका प्रमुख कार्यकारी अधिकृत देवेन्द्ररमण खनाल र गाउँपालिकाका अध्यक्ष पूर्णबहादुर धितालले एक कार्यक्रमबीच सोमवार हस्ताक्षर गरेका हुन् ।

सम्झौतापश्चात् कुनै कृषि व्यवसायमा आबद्ध १८ वर्षदेखि ६५ वर्ष उमेर सम्मका नेपाली नागरिक वा कानूनी रूपमा दर्ता भएका कृषि व्यवसायमा संलग्न फर्म वा कम्पनीले गाउँपालिकाको सिफारिससहित कर्जाको लागि आवेदन दिन सक्नेछन् । बैंकले कृषि कर्जा निर्देशिका २०६९ (संशोधन सहित) अनुसार लगानी गरिने यो कर्जा आवधिक र चालू पूँजी दुवै प्रकृतिको हुने बताइएको छ ।

यो कर्जा ग्रेस अवधिसहित अधिकतम १० वर्ष अवधिका लागि प्रदान गरिनेछ । बढीमा १० लाख रुपैयाँसम्म प्रदान गरिने किसान सरल कर्जा आधार दरमा शून्य दशमलव ५० प्रतिशत प्रिमियम जोडी ब्याजदर निर्धारण गरिने बताइएको छ । गाउँपालिकाले आफ्नो कोषबाट ऋणिलाई एक प्रतिशत ब्याज अनुदान दिने छ । हाल बैंकको आधार दर ५ दशमलव ४४ प्रतिशत रहेको छ ।