विराटनगर। सरकारले नेपाल राष्ट्र बैंकको नयाँ गभर्नर नियुक्तिको प्रक्रिया थालेसँगै निजीक्षेत्रको प्रतिनिधिमूलक संस्था उद्योग संगठन मोरङले समग्र अर्थतन्त्रको विकास तथा उद्योग व्यवसाय क्षेत्रको गतिलाई तीव्र बनाउन र नीतिगत सुधार गर्न सक्षम नेतृत्वको अपेक्षा गरेको छ ।

विगत केही वर्षदेखि अर्थतन्त्र र उद्योग व्यवसाय क्षेत्रमा देखिएको उदासीनतालाई ध्यानमा राखेर आर्थिक एवं वित्तीय क्षेत्रको गहिरो ज्ञान भएको, देशको मौद्रिक नीति, मुद्रास्फीति नियन्त्रण, ब्याजदर निर्धारण तथा वित्तीय स्थिरता जस्ता विषयमा दक्षता राख्ने व्यक्तिलाई गभर्नर नियुक्त गर्नुपर्नेमा संगठनले जोड दिएको छ ।

विगतमा राष्ट्र बैंकले अपनाएको कहिले अत्यन्त कसिलो त कहिले खुकुलो नीतिले आर्थिक एवं औद्योगिक क्षेत्र प्रभावित भएको संगठनको बुझाइ छ । यस्तो हुन नदिन, देशको आर्थिक अवस्था सुधार ल्याउन, व्यावसायिक विकास बढाउन र दिगो आर्थिक वृद्धि हासिल गर्न नेपालका उद्योग, व्यापारका जटिलताहरूलाई समेत राम्रोसँग बुझेको योग्य नेतृत्व आवश्यक रहेको संगठनले जनाएको छ ।

नेपाल राष्ट्र बैंक नेपाल सरकारको आर्थिक सल्लाहकारको रूपमा रहने भएकाले अर्थतन्त्रका वर्तमान जटिल समस्यालाई सम्बोधन गर्दै स्वदेशी उद्योगहरूलाई विश्वस्तरमा प्रतिस्पर्धी बनाउन उद्योग–व्यापारमैत्री नीति निर्माणको वातावरण बनाउन सक्ने, नेपालको वित्तीय प्रणालीलाई सुदृढ बनाउन सक्ने, आर्थिक वृद्धिका नयाँ अवसर सृजनामा मौद्रिक उपाय अवलम्बन गर्ने र अर्थतन्त्रलाई अग्रदिशामा बढाउन अन्य नीतिगत निर्णय लिन सक्ने गभर्नर नियुक्त हुने अपेक्षा गरिएको संगठनका अध्यक्ष राकेश सुरानाले बताएका छन् ।

आर्थिक एवं वित्तीय क्षेत्रको गहिरो ज्ञान भएको, देशको मौद्रिक नीति, मुद्रास्फीति नियन्त्रण, ब्याजदर निर्धारण तथा वित्तीय स्थिरता जस्ता विषयमा दक्षता राख्ने व्यक्तिलाई गभर्नर नियुक्त गर्नुपर्नेमा संगठनले जोड दिएको छ ।