चितवन । कम्प्युटर व्यवसायीहरूको छाता संस्था कम्प्युटर एसोसिएसन नेपाल महासंघ (क्यान), चितवनले पहिलोपटक ‘क्यान बिटुसी समिट चितवन–२०८१’ आयोजना गरेको छ । आयातकर्ता, अधिकृत विक्रेता र खुद्रा विक्रेताबीच सम्बन्ध विस्तार गर्ने उद्देश्यले आयोजित कार्यक्रममा सूचना प्रविधि क्षेत्रका व्यवसायी, विद्यार्थी तथा सर्वसाधारणलाई नवीनतम प्रविधि, सफ्टवेयर तथा सेवाहरूको जानकारी प्रदान गरिनेछ ।

महासंघ चितवनका अध्यक्ष विष्णुप्रसाद लामिछानेका अनुसार ‘चितवनको समृद्धि, सूचना र प्रविधि’ मूल नाराका साथ आयोजना गरिएको उक्त कार्यक्रम आज (शुक्रवार) र शनिवार चितवन गार्डेन रिसोर्ट (सीजीआर)मा सञ्चालन हुनेछ । कार्यक्रमले चितवन र आसपासका सूचना प्रविधि क्षेत्रमा संलग्न व्यवसायीबीच सम्पर्क र सम्बन्ध विस्तारमा सहयोग पुग्ने उनले बताए ।

दुई दिनसम्म चल्ने कार्यक्रममा सूचना प्रविधिसम्बन्धी प्रदर्शनी तथा सेमिनारसमेत आयोजना गरिनेछ । शुक्रवार आयातकर्ता, आधिकारिक विक्रेता तथा खुद्रा विक्रेताबीच (बिटुसी) कार्यक्रम हुनेछ भने शनिवार आयातकर्ता र डिलरबीच (बिटुबी) कार्यक्रम सञ्चालन गरिनेछ ।

महासंघले सूचना प्रविधिको विकासले नेपालको आर्थिक उत्पादन वृद्धि गर्ने विश्वास व्यक्त गरेको छ । नेपाली युवाशक्ति विदेश पलायन भइरहेको अवस्थामा यस्ता कार्यक्रमले उनीहरूलाई देशमै अवसर खोज्न प्रेरित गर्ने आयोजकको भनाइ छ । सूचना प्रविधिको अध्ययन गर्न इच्छुक विद्यार्थीहरूलाई समेत आवश्यक परामर्श प्रदान गरिनेछ ।

चितवनमा सूचना प्रविधि क्षेत्रमा कार्यरतहरूको यकिन तथ्यांक उपलब्ध छैन । तर, महासंघको विवरणअनुसार २१० जना व्यवसायी संस्था आबद्ध छन् भने २५० भन्दा बढी युवा स्वतन्त्र रूपमा कार्यरत रहेको अनुमान गरिएको छ । महासंघले सूचना प्रविधि क्षेत्रलाई थप सशक्त बनाउन ‘क्यान इन्फोटेक’ जस्ता प्रविधि मेलाहरू आयोजना गर्दै आएको छ । यसपटक भने कार्यक्रमलाई केही भिन्न ढंगले सञ्चालन गर्न खोजिएको आयोजकले जनाएको छ ।