काठमाडौं । वन तथा वातावरण मन्त्री ऐनबहादुर शाही ठकुरी र काठमाडौं क्षेत्र नम्बर २ की प्रतिनिधिसभा सदस्य सोबिता गौतमले चैत १५ गतेको राजावादी आन्दोलनका क्रममा जलाइएको जडिबुटी उत्पादन तथा प्रशोधन केन्द्रको निरीक्षण गरेका छन्।

बिहीबार बिहान मन्त्री ठकुरी र रास्वपाकी सांसद गौतमले जडिबुटीस्थित प्रशोधन केन्द्र पुगेर आगलागीबाट ध्वस्त बनेका संरचनाको अवलोकन गरेका हुन्।

राजावादी आन्दोलनका क्रममा प्रदर्शनकारीहरूले लगाएको आगोका कारण प्रशोधन केन्द्र पूर्णरूपमा क्षतिग्रस्त भएको छ। आगलागीमा गाडीहरू जलेका छन् र करोडौंको क्षति पुगेको छ।

प्रशोधन केन्द्रकी महाप्रबन्धक संगीता यादवसहितका पदाधिकारीहरूले आगलागीबाट भएको क्षति देखाउँदै मन्त्री र सांसदलाई जानकारी दिएका थिए।

निरीक्षणपछि मन्त्री ठकुरीले केन्द्रलाई छिटोभन्दा छिटो पुनः सञ्चालनमा ल्याउन गृहकार्य भइरहेको बताएका छन्। उनले भने, “प्राविधिक र विज्ञहरूसँग छलफल भइरहेका छन्। १० करोड रुपैयाँ भएमा अस्थायी रूपमा केन्द्र सञ्चालन गर्न सकिन्छ। क्याबिनेटमा छलफल भइसकेको छ, चाँडै रकम उपलब्ध हुन्छ।”

उनले शहरी विकास विभागमार्फत क्षतिको मूल्यांकन भइरहेको र पुनर्निर्माण प्रक्रिया चाँडै अघि बढ्ने जानकारी दिए। “उत्पादन वृद्धि र रोजगारीको सुनिश्चितताका लागि सबै प्रक्रिया पुरा गरेर पुनः सुचारू गर्छौं,” मन्त्री ठकुरीले भने।

सांसद गौतमले आगलागीबाट २८ करोड रुपैयाँ बराबरको क्षति भएको भन्दै दोषीलाई कानुनी दायरामा ल्याउन सरकारसँग माग गरिन्। साथै, उनले उक्त केन्द्र घना बस्तीमा भएकाले उपयुक्त स्थानमा सार्नुपर्ने धारणा राखिन्। “स्थापना हुँदा यो ठाउँ खुला थियो, अहिले घना बस्ती भइसकेकाले स्थानान्तरण आवश्यक भएको महसुस भएको छ। सरकारले उपयुक्त स्थान छनोट गरेर योजना बनाउनु पर्छ,” उनले भनिन्।

महाप्रबन्धक यादवले नयाँ उत्पादन तयारीको बेला आगलागी हुँदा ठूलो क्षति भएको बताउँदै दुई भवन र १३ ओटा सवारी साधन जलेको जानकारी दिइन्। उनका अनुसार कुल २८ करोड बराबरको क्षति भएको छ। उनले तत्काल १० करोड रुपैयाँ उपलब्ध भएमा सेवा पुनः सुचारू गर्न सकिने बताइन्। “सेवा सुचारू गर्ने प्रयास भइरहेका छन्। मन्त्रीज्यूले चाँडै आर्थिक प्याकेज घोषणा गर्ने बताउनु भएको छ,” यादवले भनिन्।

केन्द्रका कर्मचारीहरूले उत्पादन बन्द हुँदा बेरोजगार हुने चिन्ता व्यक्त गर्दै सांसद गौतमसँग पहल गरिदिन आग्रह गरेका छन्।