काठमाडौं । सनराइज क्यापिटल लिमिटेडले माघ १० गतेदेखि विक्रीमा ल्याएको सनराइज फोकस्ड इक्विटी फण्डको इकाई माघ २४ गतेसम्म विक्रीमा रहने भएको छ । छिटो अवधि माघ १३ गतेसम्म मागबमोजिम आवेदन नपरेपछि क्यापिटलले ढिलो अवधि माघ २४ गतेसम्म विक्रीको मिति तय गरेको हो । यस अवधिअगावै मागबमोजिम आवेदन परेमा भने जुनसुकै मितिमा विक्री गरिने जानकारी क्यापिटलले दिएको हो । 

क्यापिटलले यो फण्ड सञ्चालनका लागि प्रतिइकाई १० रुपैयाँ अंकित मूल्यका १२ करोड इकाई विक्री गर्न लागेको हो । कूल इकाईमध्ये १ करोड ८० लाख इकाई कोष प्रबद्र्धक सनराइज बैंक लिमिटेडलाई सुरक्षित राखिएको छ । योबाहेक बाँकी न्यूनतम १० करोड २० लाख इकाई सार्वजनिक निष्कासनमार्फत विक्रीमा ल्याइएको हो । 

इकाई खरीदकर्ताहरूले न्यूनतम १०० इकाईदेखि अधिकतम १ करोड २० लाख इकाईसम्म माग गर्दै आवेदन दिन सक्नेछन् । १० वर्षे अवधिको बन्दमुखी प्रकृतिको यस योजनाको कूल आकार १ अर्ब २० करोड रुपैयाँ छ । यस योजनाको विक्री हुनुपर्ने न्यूनतम इकाई ६ करोड छ । 
न्यूनतम विक्री हुनुपर्ने इकाई विक्री नभएमा उक्त योजना खारेज गरी १५ दिनभित्र निवेदनको रकम फिर्ता भुक्तानी प्रक्रिया शुरु गरिने योजना व्यवस्थापकको भनाई छ । 

यस योजनाको इकाई विक्री प्रबन्धक सनराइज क्यापिटल लिमिटेड छ । खरीदकर्ताहरूले विक्री प्रबन्धकसँगै नेपाल धितोपत्र बोर्डबाट स्वीकृति प्राप्त सम्पूर्ण आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरूबाट आवेदन दिन सक्नेछन् । 

यस योजनाको इकाई निष्कासनका लागि गराइएको रेटिङ्गमा केयर रेटिङ्ग नेपालले योजना व्यवस्थापकलाई केयर एनपी एएमसी क्वालिटी ३ (एएमसी३) रेटिङ्ग प्रदान गरेको छ भने कोष प्रबद्र्धकलाई केयर एनपी ए माइनस (आईएस) रेटिङ्ग प्रदान गरेको छ । यी रेटिङ्गले कर्जा जोखिम कम रहेको र वित्तीय दायित्व वहन गर्ने सम्बन्धमा पर्याप्त सुरक्षित रहेको संकेत गर्छ ।