काठमाडौं। सोल्टी होटेल एण्ड रिसोर्ट्सले रूपन्देहीको भैरहवामास्थित पाँचतारे होटेल टाइगर प्यालेस रिसोर्ट्स (होटेल)को व्यवस्थापन गर्ने भएको छ । सोल्टी होटल्स र टाइगर प्यालेसबीच शुक्रवार काठमाडौंमा होटेल व्यवस्थापन सम्बन्धी सम्झौता भएको छ । सम्झौतासँगै टाइगर प्यालेसलाई सोल्टीले टाइर्गर प्यालेस वाई सोल्टीको नाम तथा ब्राण्डबाट व्यवस्थापन तथा सञ्चालन गर्ने बताइएको छ । दुवै होटेलको सहकार्यले टाइगर प्यालेसको प्रतिष्ठा तथा नेपालको अग्रणी लक्जरी होटेल ब्रान्ड, सोल्टीको व्यवस्थापनमा थप व्यवस्थित रूपमा अगाडि बढाउने अपेक्षा गरिएको छ । 

नेपाल भारतको सीमा नजिक, गौतमबुद्ध अन्तरराष्ट्रिय विमानस्थलको समिपमा अवस्थित टाइगर प्यालेस रिर्सोटस् उत्कृष्ट अतिथि सत्कारको साथै आधुनिक विलासितायुक्त मानिन्छ । पर्यटकीय गन्तव्य लुम्बिनीको पृष्ठभूमीमा रहेको टाइगर प्यालेसले विश्वस्तरीय आतिथ्य सेवा तथा सुविधा प्रदान गर्दै आएको दाबी गरेको छ ।

सोल्टीले भैरहवामा आफ्नो सेवा विस्तार गर्दै नेपालमा लक्जरी आतिथ्यताको आफ्नो अग्रणी स्थानलाई सुदृढ पार्न यो सहकार्य महत्त्वपूर्ण कोसेढुंगा सावित हुने अपेक्षा गरेकोे छ । उक्त सम्झौताले यस क्षेत्रको आतिथ्य उद्योगको विकासमा नयाँ आयाम थप्दै अनुपम विलासितायुक्त सेवा सुविधासहित अन्तरराष्ट्रियस्तरको बसाई अनुभव प्रदान गर्ने प्रति समर्पित रहने अपेक्षा गरिएको छ ।