काठमाडौं। विश्व पानी दिवसको अवसरमा सिद्धार्थ बैंकले ‘वाक फर वाटर, वाक फर लाइफ’ प्रभातफेरी कार्यक्रम (वाकाथन) सम्पन्न गरेको छ । बैंकले दिगो विकासका लक्ष्यलाई आत्मसात् गर्दै आफ्नो बैंकिङ कारोबार तथा प्रक्रियालाई सोही अनुरूप गर्दै आएको बताइएको छ । यसै क्रममा बैंकले पर्यावरणीय, सामाजिक तथा सुशासनको मान्यतालाई अवलम्बन गरी वित्तीय सेवामा दिगोपन सुनिश्चित गर्न विविध नीति तथा कार्यक्रम समेत लागू गरिसकेको बताइएको छ । हरित वित्त, आधुनिक डिजिटल बैंकिङ तथा सामाजिक उत्तरदायित्वका पहलमार्फत बैंक वित्तीय पहुँच विस्तार गर्न सदैव तयार रहेको बैंकको भनाइ छ । पुनर्नवीकरणीय ऊर्जा, वातावरणमैत्री लगानी तथा जिम्मेवार बैंकिङ अभ्यासलाई प्राथमिकता दिँदै दिगो आर्थिक वृद्धिमा योगदान पुर्‍याउन पनि बैंक प्रतिबद्ध रहेको बताइएको छ ।

संयुक्त राष्ट्र संघले सन् १९९३ देखि हरेक वर्ष २२ मार्चमा विश्व पानी दिवस मनाउँदै आएको छ । यस दिवसको उद्देश्य दिगो विकास लक्ष्यअन्तर्गत सबैका लागि पानी र सरसफाइ सुनिश्चित गर्न योगदान पुर्‍याउनु रहेको बताइएको छ । यस क्रममा बैंकले आफ्नो दिगो बैंकिङ उद्देश्यलाई थप सार्थक बनाउन र जनमानसमा पानीको महत्त्वको बारेमा जनेतना फैलाउन वाकाथन कार्यक्रम आयोजना गरिएको बताइएको छ ।