काठमाडौं। ब्लू स्ट्रिक्स च्याप्टर लिडर अनबोर्डिङ इभेन्टपछि यामाहाले आफ्नो वितरक एमएडब्लू राइड्समार्फत आफ्ना च्याप्टर लिडरका लागि आधारभूत रोड मार्शल तालीमको आयोजना गरेको छ । यो तालीम यामाहा ब्लू स्ट्रिक्सका लिडरलाई सुरक्षित र व्यवस्थित टुरिङ र सामूहिक सवारीको नेतृत्व गर्न आवश्यक शीप प्रदान गर्ने महत्त्वपूर्ण कदमको रूपमा रहेको कम्पनीको भनाइ छ ।

तालीम सडक सुरक्षा, सामूहिक सवारी व्यवस्थापन र प्रभावकारी सञ्चारका आधारभूत विषयमा केन्द्रित थियो । सत्रले यामाहाको राइडर समुदायमा जिम्मेवारी र सुरक्षाको संस्कृतिलाई बढावा दिँदै सहज र सुरक्षित सवारी सुनिश्चित गर्न व्यावहारिक अन्तरर्दष्टि समेत प्रदान गरेको कम्पनीको विश्वास छ ।

अन्तरक्रियात्मक मोड्युल र वास्तविकतामा आधारित परिदृश्यमार्फत यामाहा राइड–आउट कार्यक्रम र सामुदायिक सवारी दुवै सहज र दुर्घटनारहित बनाउन यी लिडरलाई रोड मार्शलको भूमिका निर्वाह गर्न सशक्त बनाउने प्रशिक्षणको उद्देश्य रहेको बताइएको छ । एमएडब्लू राइड्सका कार्यकारी निर्देशक र प्रमुख कार्यकारी अधिकृत दीपककुमार अग्रवालले नेतृत्व मार्गदर्शन मात्र नभई जिम्मेवारी पनि भएको बताए । ‘हाम्रा ब्लू स्ट्रिक्स लिडरलाई ज्ञान र शीपद्वारा सशक्त बनाउने यामाहाको प्रतिबद्धता अनुरूप यो तालीम सञ्चालन गरिएको हो,’ उनले भने ।