काठमाडौं । महालक्ष्मी विकास बैंक लिमिटेडले वार्षिक साधारण सभा सम्पन्न भएकै दिनदेखि नगद लाभांश वितरण गरेको छ । कम्पनीले गत वर्षको मुनाफाबाट यस वर्ष कुल ७ प्रतिशत लाभांश वितरण गर्ने प्रस्ताव पुस २९ गते सम्पन्न वार्षिक साधारण सभाबाट पारित गरेको थियो ।

कम्पनीले हाल कायम चुक्तापूँजी ४ अर्ब १७ करोड १३ लाख १८ हजार रुपैयाँको आधारमा ३ प्रतिशत बोनस शेयर र करसमेत ४ प्रतिशत नगद लाभांश वितरण गर्ने प्रस्ताव पारित गरेको हो । साधारण सभा सम्पन्न भएकै दिनदेखि करसमेत ४ प्रतिशत नगद लाभांश सम्बन्धित शेयधरनीहरूको बैंक खातामा जम्मा गरिएको जानकारी कम्पनीले दिएको छ ।

यस वर्ष कम्पनीले गत वर्षभन्दा बढी लाभांश वितरण गर्न लागेको हो । गत वर्ष कम्पनीले करसमेत ६ दशमलव ४ प्रतिशत नगद लाभांश वितरण गरेको थियो । यस वर्षको लाभांश गत पुस १४ गतेसम्म कायम शेयधरनीहरूले मात्र पाउनेछन् । नगद लाभांश वितरण गरिसकेको कम्पनीले बोनस शेयर भने धितोपत्र दोस्रो बजारमा सूचीकृत भएपछि सम्बन्धित शेयधरनीहरूको हितग्राही खातामा नै जम्मा गर्ने बताएको छ ।

गत पुस १४ गतेसम्म शेयर धितो राखी कर्जा उपयोग गरेका सदस्यहरूले सम्बन्धित बैंक तथा वित्तीय संस्थाबाट फुकुवा पत्र प्राप्त गरी कम्पनीमा पेश गरेपछि मात्र नगद लाभांश वितरण गरिने जानकारीसमेत कम्पनीले दिएको छ । कम्पनीको शेयर रजिष्ट्रारमा सिद्धार्थ क्यापिटल लिमिटेड रहेको छ ।

Mahalaxmi Bikas Bank Limited (MLBL)

Mahalaxmi Bikas Bank Limited (MLBL)