काठमाडौं। महालक्ष्मी विकास बैंकले चैत ४ देखि १० गतेसम्म साताव्यापी वित्तीय साक्षरता कार्यक्रम गर्दै ‘ग्लोबल मनी विक २०२५’ मनाएको छ । सो अवसरमा वित्तीय पहुँचबाट बाहिर रहेका विभिन्न लक्षित वर्ग पहिचान गरी बैंकका विभिन्न शाखा तथा प्रादेशिक कार्यालयद्वारा वित्तीय साक्षरता, र्याली तथा चेतनामूलक कार्यक्रम गरिएको बताइएको छ ।
बैंकले गंगबु, धनगढी, चन्द्रनिगापुर, दमौली, इटहरी, जनकपुर, वीरगञ्ज, दमक, टिकापुर, महेन्द्रनगर, बुटवल, लेकसाइड पोखरा, केन्द्रीय कार्यालय लगायतका कार्यालयमार्फत कार्यक्रम गरिएको हो । कार्यक्रममार्फत विद्यार्र्थी तथा युवामा वित्तीय साक्षरता अभिवृद्धि गर्दै वित्तीय ज्ञान, शीप र मनोवृत्ति विकासका लगि वित्तीय साक्षरताका कार्यक्रम तथा प्रभातफेरी कार्यक्रम सञ्चालन गरिएको बताइएकोे छ । कार्यक्रममा १ हजार २ सय जनाभन्दा बढीको सहभागिता रहेको थियो । उक्त कार्यक्रममा बचत, कर्जा, लगानी, सफा नोट, विद्युतिय वित्तीय सेवा, विप्रेषण, गुनासो सुनुवाई, वित्तीय सेवा प्रदायक संस्था, धितोपत्र बजार, जोखिम व्यवस्थापन, बीमा, वित्तीय ठगी र वित्तीय अनुशासन सम्बन्धी विषयवस्तुमा जानकारी गराइएको थियो ।
