काठमाडौं । आगलागी जोखिम न्यूनीकरण तथा विद्युतीय सुरक्षासम्बन्धी नवीनतम प्रविधिको प्रवर्द्धन गर्ने उद्देश्यले आयोजित ‘फायर सेफ्टी एन्ड इलेक्ट्रोनिक सेक्युरिटी इन्टरनेशनल कन्फ्रेन्स २०२५’ सोमवार सम्पन्न भएको छ । सम्मेलनले १० बुँदे काठमाडौं घोषणापत्र जारी गरेको छ ।

एशिया प्यासिफिक सेक्युरिटी एसोसिएसन (अस्पा), नेपालद्वारा आयोजित दुईदिने सम्मेलनमा १४ अन्तरराष्ट्रिय देशहरूका विज्ञहरूको सहभागिता थियो ।

सम्मेलनको उद्घाटन गर्दै वन तथा वातावरणमन्त्री ऐनबहादुर शाही ठकुरीले वन डढेलो नियन्त्रण र व्यवस्थापनका लागि अत्याधुनिक उपकरण र तालिमप्राप्त जनशक्तिको खाँचो रहेको उल्लेख गरेका थिए । दमकल बाहेक अन्य वैकल्पिक उपायको विकासमा सरकार प्रतिबद्ध रहेको र डढेलो नियन्त्रणका लागि सबै सरोकारवालाबीच समन्वय अपरिहार्य रहेको उनले बताएका थिए ।

सम्मेलनका प्रमुख सन्देशहरू घोषणापत्रमार्फत सार्वजनिक गरिएको छ । घोषणापत्रमा सार्वजनिक चेतनाको अभिवृद्धि, भवन कोडको आधुनिकीकरण, डढेलो तथा शहरी वन डढेलोको जोखिम न्यूनीकरण, ड्रोन प्रयोगको मापदण्ड, कृत्रिम बुद्धिमत्ताको जिम्मेवार उपयोग, विद्युतीय सवारीसाधनमा आगलागीको व्यवस्थापन, सुरक्षासम्बन्धी उत्पादनका मापदण्ड, शैक्षिक पाठ्यक्रममा सुरक्षाको समावेश र क्षेत्रीय सहकार्य जस्ता प्रमुख बुँदामा प्रतिबद्धता जनाइएको छ ।

अस्पा नेपालका अध्यक्ष सुनिलकुमार श्रेष्ठले सम्मेलनमा उठेका विचार, सिफारिस र प्रविधिमूलक समाधानलाई सम्बन्धित सरकारी निकायहरूसमक्ष प्रस्तुत गर्दै नीतिगत सुधारको दिशामा सहकार्य गर्ने प्रतिबद्धता जनाए । आगलागी सुरक्षा र विद्युतीय सुरक्षालाई केवल प्राविधिक विषय मात्र नभई जनताको जीवन, पूर्वतयारी र समग्र सुरक्षासँग जोडिएको विषयका रूपमा लिनुपर्ने बताए ।

सम्मेलनमा गृह मन्त्रालय, शहरी विकास मन्त्रालय, नेपाल प्रहरी, सशस्त्र प्रहरी बल, नेपाली सेनाका साथै देशभरका स्थानीय तहका प्रतिनिधिहरू, उद्योग क्षेत्रका अग्रणी व्यक्ति, तथा विद्युत सुरक्षा र आगलागीका विज्ञहरू सहभागी थिए । साथै भारत, चीन, जापान, दक्षिण कोरिया, सिंगापुर, मलेसिया, थाइल्यान्ड, भियतनाम, इन्डोनेसिया, श्रीलंका, हङकङ, मकाउ, फिलिपिन्स लगायतका देशहरूका विशेषले कार्यपत्र प्रस्तुत गरेका थिए ।

सम्मेलनका क्रममा अन्तरक्रियात्मक सत्रहरू, प्रविधि प्रदर्शनीहरू तथा अन्तरराष्ट्रिय अनुभव साटासाट कार्यक्रम सञ्चालन गरिएको थियो । सहभागीहरूले आधुनिक प्रविधि, सुरक्षासम्बन्धी वैश्विक अभ्यास र भविष्यका लागि आवश्यक रणनीतिहरूमा विस्तृत छलफल गरेका थिए ।

सम्मेलनले सम्पूर्ण सरोकारवालालाई एक साझा मञ्चमा ल्याएर आगलागी तथा विद्युतीय सुरक्षासम्बन्धी दिगो समाधानका लागि दीर्घकालीन कार्ययोजना निर्माण गर्न सहयोग पुर्‍याएको बताइएको छ ।