साउन ८, काठमाडौं । राप्ती हाईड्रो एण्ड जनरल कन्स्ट्रक्सन लिमिटेडको आईपीओ आगामी सोमवार बाँडफाँट हुने भएको छ । विक्री प्रबन्धक सिद्धार्थ क्यापिटलको अनुसार आफ्नै कार्यालयमा आईपीओ बाँडफाँट गरिने भएकाे हाे । 

आईपीओ बाँडफाँट गोलाप्रथाबाट हुनेछ, जसमा २ लाख १७ हजार ६९४ जनाले १० कित्ताका दरले शेयर पाउनेछन् । आवेदन दिएकामध्ये १३ लाख २० हजार ९९४ जनाको हात खाली हुनेछ । यसमा कुल १५ लाख ३८ हजार ६८८ जनाले १ करोड ७२ लाख ६५ हजार १५० कित्ताका लागि आवेदन दिएका थिए । 

कम्पनीले असार २९ गतेबाट साउन १ गतेसम्म २३ करोड ६६ लाख २४ हजार रूपैयाँ बराबरको २३ लाख ६६ हजार २४० कित्ता साधारण शेयर निष्कासन (आईपीओ) विक्री खुला गरेको थियाे । कम्पनीले यसअघि स्थानीय बासिन्दाका ला निष्कासन गरी विक्री नभएको ३७ हजार ६३२ कित्ता शेयर पनि थप गरेर आईपीओ विक्रीमा ल्याएको हो । यसमध्ये ५ प्रतिशत अर्थात् १ लाख १८ हजार ३१२ कित्ता सामूहिक लगानी कोष र ३ प्रतिशत अर्थात् ७० हजार ९८८ कित्ता शेयर कर्मचारीहरूका लागि छुट्याइएको थियो । 
 
बाँकी २१ लाख ७६ हजार ९४० कित्ताका लागि सर्वसाधारणलाई निष्कासन गरेको हो । रेटिङ एजेन्सी केयर नेपालले कम्पनीको आईपीओलाई ‘कियरएनपी इस्यूअर रेटिङ बी’ प्रदान गरेको छ । जसले कम्पनीको दायित्व वहन गर्ने क्षमतामा उच्च जोखिम रहेको जनाउँछ ।