काठमाडौं । नेरुडे लघुवित्त वित्तीय संस्था लिमिटेडले १६औं वार्षिक साधारण सभा शनिवार (भोलि) गर्ने भएको छ । सभा उद्योग संगठन विराटनगर, मोरङ्गमा बिहान ११ बजे शुरु गर्ने कम्पनीले जानकारी दिएको हो ।
सभाले गत आर्थिक वर्ष ०७८/७९ को वार्षिक प्रतिवेदन सहितका वित्तीय विवरणहरू पारित गर्नुका साथै प्रस्तावित कुल २३ दशमलव १६ प्रतिशत लाभांशलाई समेत स्वीकृति प्रदान गर्नेछ ।
कम्पनीले गत आर्थिक वर्षको वितरणयोग्य मुनाफाबाट हाल कायम चुक्तापूँजी २२ प्रतिशत बोनस शेयर र कर प्रयोजनका लागि १ दशमलव १६ प्रतिशत नगद लाभांश वितरणको प्रस्ताव गरेको हो । साथै सभाले अन्य कुनै उपयुक्त वित्तीय संस्थासँग मर्जर तथा प्राप्ति प्रक्रियामा जाने भएमा त्यसको सम्पूर्ण जिम्मेवारी सञ्चालक समितिलाई दिने निर्णय पनि गर्नेछ ।
साधारण सभा प्रयोजनका लागि कम्पनीले माघ १७ गते बुक क्लोज गरेको थियो । बुक क्लोजको आधारमा माघ १६ गतेसम्म कायम शेयरधनीहरू मात्र लाभांश प्राप्त गर्न र सभामा भाग लिन पाउनेछन् ।
